16-mart, shanba kuni Alisher Navoiy nomidagi Toshkent davlat o‘zbek tili va adabiyoti universitetida O‘zbekiston Respublikasi Mudofaa vazirligi tizimidagi tarbiyaviy va mafkuraviy ishlar bo‘yicha organ ofitserlarining malaka oshirish kurslari bitiruvchilariga sertifikatlar topshirildi, deb xabar beradi universitet matbuot xizmati.
Mazkur malaka oshirish kurslari faoliyatini samarali tashkil qilish maqsadida respublikadagi yetakchi mutaxassislar jalb qilingan.
Tinglovchilar ikki hafta mobaynida siyosatshunoslik va mafkuraviy targ‘ibot, o‘zbek davlatchiligi va harbiy san’ati tarixi, adabiyot va inson kamoloti, amaliy psixologiya, sotsiologiya, kasb etikasi va etiket kabi modullar bo‘yicha malaka oshirish kurslaridan o‘tgan.
Malaka oshirish kursida tahsil olib, yakuniy davlat attestatsiyasidan muvaffaqiyatli o‘tgan 25 nafar ofitserga malaka sertifikatlari topshirilgan. Kursni muvaffaqiyatli yakunlagan ofitserlar o‘z xizmat vazifalarini o‘tash joylariga kuzatilgan.
Ma’lumot uchun, O‘zbekiston Respublikasi Qurolli kuchlari tizimida ma’naviy-ma’rifiy ishlar samaradorligini yanada takomillashtirish, harbiy xizmatchilarning ijtimoiy-siyosiy o‘zgarishlar bilan uyg‘un ravishda bilimlarini oshirib borishning zamonaviy usullarini joriy etish, shuningdek, ichki va tashqi tahdidlarga qarshi mafkuraviy immuniteti shakllangan, burchiga sadoqatli, yuqori professional harbiy xizmatchilarni tayyorlash maqsadida mazkur kurslar olib borilmoqda, deyiladi xabarda.
Izoh (0)