Toshkent viloyatida turizmning ekstremal va tog‘ turizmi yo‘nalishlari bo‘yicha qulay muhit yaratilgan. Chang‘i, snoubording, paraplan va deltoplanda uchish, velosport, motosport kabi sport turlarini rivojlantirish uchun tabiiy sharoitlar yetarli. Ayni paytda O‘zbekiston Ekstremal va tog‘ turizmi federatsiyasi tomonidan Toshkent viloyatida turizmning ekstremal turlarini rivojlantirish bo‘yicha keng qamrovli ishlar amalga oshirilmoqda, deb yozadi O‘zA.
Turizmni rivojlantirish qo‘mitasi ko‘magida Ekstremal va tog‘ turizmi federatsiyasi tomonidan Toshkent viloyatida qishki sport festivali o‘tkazildi.
Xususan, Chimyon tog‘idagi “Chimyon Oromgohi”da Chimgan-Extreme – 2019 qishki sport turlari bo‘yicha tog‘ festivali o‘tkazildi. Festival doirasida chang‘i, snoubording, paraplanda uchish bo‘yicha musobaqalar bo‘lib o‘tdi. Tadbir Toshkent viloyati, Bo‘stonliq tumanida tashkil etildi.
Shuningdek, joriy yilning fevral—noyabr oylariga qadar Markaziy Osiyoning tog‘li hududlarida paraplanda uchish bo‘yicha Uzbekistan Cross country cup – 2019 O‘zbekiston ochiq kubogi o‘tkazilmoqda.
O‘zbekistonda aerostatlar (havo sharlari) parvozi ham ommalashmoqda. O‘zbekiston Aeronavtika federatsiyasi loyihasi doirasida Toshkent, Samarqand va Buxoro shaharlarida 325 marta aerostatlar (havo sharlari) parvozi 2100 dan ortiq kishi ishtirokida amalga oshirildi. Aerostatlarda parvoz uchun 4 nafar uchuvchi tayyorgarlikdan o‘tkazildi.
Ilk parvozlarda 200 nafar bola, jumladan, Mehribonlik uyi tarbiyalanuvchilari, ijtimoiy himoyaga muhtoj oilalarning farzandlari, shuningdek, imkoniyati cheklanganlar ishtirok etdi.
Aerostatlar O‘zbekistonning tarixiy obidalari ustidan 17 marotaba ko‘tarildi.
Izoh (0)