Ўзбекистонда Буюк Ипак йўли бўйлаб биринчи ҳаво шари экспедицияси ўтказилди

Тошкент вилоятида туризмнинг экстремал ва тоғ туризми йўналишлари бўйича қулай муҳит яратилган. Чанғи, сноубординг, параплан ва делтопланда учиш, велоспорт, мотоспорт каби спорт турларини ривожлантириш учун табиий шароитлар етарли. Айни пайтда Ўзбекистон Экстремал ва тоғ туризми федерацияси томонидан Тошкент вилоятида туризмнинг экстремал турларини ривожлантириш бўйича кенг қамровли ишлар амалга оширилмоқда, деб ёзади ЎзА.

Туризмни ривожлантириш қўмитаси кўмагида Экстремал ва тоғ туризми федерацияси томонидан Тошкент вилоятида қишки спорт фестивали ўтказилди.

Хусусан, Чимён тоғидаги «Чимён Оромгоҳи»да Chimgan-Extreme – 2019 қишки спорт турлари бўйича тоғ фестивали ўтказилди. Фестиваль доирасида чанғи, сноубординг, парапланда учиш бўйича мусобақалар бўлиб ўтди. Тадбир Тошкент вилояти, Бўстонлиқ туманида ташкил этилди.

Шунингдек, жорий йилнинг февраль—ноябрь ойларига қадар Марказий Осиёнинг тоғли ҳудудларида парапланда учиш бўйича Uzbekistan Cross country cup – 2019 Ўзбекистон очиқ кубоги ўтказилмоқда.

Ўзбекистонда аэростатлар (ҳаво шарлари) парвози ҳам оммалашмоқда. Ўзбекистон Аэронавтика федерацияси лойиҳаси доирасида Тошкент, Самарқанд ва Бухоро шаҳарларида 325 марта аэростатлар (ҳаво шарлари) парвози 2100 дан ортиқ киши иштирокида амалга оширилди. Аэростатларда парвоз учун 4 нафар учувчи тайёргарликдан ўтказилди.

Илк парвозларда 200 нафар бола, жумладан, Меҳрибонлик уйи тарбияланувчилари, ижтимоий ҳимояга муҳтож оилаларнинг фарзандлари, шунингдек, имконияти чекланганлар иштирок этди.

Аэростатлар Ўзбекистоннинг тарихий обидалари устидан 17 маротаба кўтарилди.