Pokistonda O‘zbekiston sayyohlik axborot markazi tashkil etildi. Marosimda mamlakatning Pokistondagi Favqulodda va muxtor elchisi Furqat Siddiqov hamda Pokiston iqlim o‘zgarishi vaziri Zartaj Gul xonim so‘zga chiqdi. Tadbirda ikki davlat vazirlik va idoralari vakillari, soha mutaxassislari, jurnalistlar ishtirok etdi. Bu haqda Turizmni rivojlantirish davlat qo‘mitasi matbuot xizmati xabar qilmoqda.
Mamlakat Markaziy Osiyo davlatlari orasida Pokiston bilan to‘g‘ridan to‘g‘ri muntazam havo transporti aloqasiga ega mamlakat hisoblanadi. Pokiston sivilizatsiya o‘chog‘i hamdir. Sayyohlik markazining tashkil etilishi mamlakatlar o‘rtasida azaliy hamkorlik aloqalarini yangi bosqichda rivojlantirishga xizmat qiladi.
Tadbirda F.Siddiqov O‘zbekistonda amalga oshirilayotgan islohotlar, xususan, ta’lim muassasalari, biznes imkoniyatlari, sanoat va sayyohlik imkoniyatlari haqida ma’lumot berdi. Pokistonliklarning O‘zbekistonda ta’lim, biznes va turizm sohalaridagi faoliyatini yuksak baholab, ular uchun keng imkoniyatlar eshigi ochilganini alohida qayd etdi.
– Bu markaz pokistonlik yoshlar uchun ham keng imkoniyatlar yaratadi, – dedi Z.Guli. – Endilikda, ular dunyo sivilizatsiyasiga, xususan, islom dini rivojiga munosib hissa qo‘shgan zamin, bu yerda yashab o‘tgan buyuk ulamolar, olimlar haqida to‘liq ma’lumot olish imkoniga ega bo‘lishadi.
Xabarda 2018-yilning mart oyidan e’tiboran FlyDubai aviakompaniyasi tomonidan Pokiston – Toshkent aviareysi yo‘lga qo‘yilgani haqida aytilgan. Hozirga qadar Lahor – Toshkent aviaqatnovi yo‘lga qo‘yilgan edi.
Izoh (0)