Andijon viloyati ichki ishlar boshqarmasi boshlig‘i, 3-sektor hisoblangan Asaka tumanining Arg‘in mahallasida sayyor qabul o‘tkazdi. Dastlab, tuman hududini kompleks ijtimoiy-iqtisodiy rivojlantirish bo‘yicha 3-sektor ishchi guruhi shtabining faoliyati bilan yaqindan tanishildi. Bu haqda “Daryo”ga viloyat IIB matbuot xizmati xabar bermoqda.
Viloyat IIB matbuot xizmati boshlig‘i Sherzodbek Nuriddinovning ma’lum qilishicha, qabulda Asaka tumani hokimi Erkin Yakubov hamda tuman IIB mas’ul xodimlari, sektorga qarashli Arg‘in, Tuvadoq, Do‘rman, Novkan, Toshtepa, Mirzaobod, Namuna-Bo‘ston, Fayz mahallalarida yashovchi 150 dan ortiq fuqaro ishtirok etgan.
Sayyor qabul davomida yo‘llarni shag‘allash, elektr tayanchlari o‘rnatish va eskirgan transformatorlarni almashtirish, ichimlik va oqava suvi, imtiyozli kreditlar olish, hududda maktabgacha ta’lim muassasasini qurish va suyultirilgan gaz balonlarini ajratilishi bo‘yicha 70 ga yaqin murojaat qabul qilindi.
— Bir necha yillardan beri Rossiyaga borib qurilish tashkilotlarida ishlab kelardim, — deydi Tuvadoq mahallasida istiqomat qiluvchi Sheraliyev Ma’mirbek. – O‘tgan yili ayrim sabablarga ko‘ra deportatsiya bo‘lganman. Hozirda ishsizman. Uchrashuvda bandligimni ta’minlashda yordam so‘rab murojaat qildim. Ikki-uch joydan ish taklif qilishdi. Qishlog‘imizda ochilgan yangi ishlab chiqarish korxonasi faoliyati va oylik maoshi ma’qul kelyapti.
— Ko‘chamiz ahvoli juda yomon, — deydi Tuvadoq mahallasi fuqarosi Pastki tuvadoq ko‘chasida Surayyoxon Alimova. — Qish kunlarida yurishga qiynalamiz, loy bo‘lib ketadi. Hech bo‘lmasa shag‘al to‘kib berish imkoni bo‘lsa, yaxshi bo‘lardi.
Murojaatlarning aksariyati shu yerning o‘zida hal etilgan bo‘lsa, qolganlari bo‘yicha esa tegishli tashkilot va muassasa rahbarlariga berilib, ijrosini ta’minlash bo‘yicha yo‘l haritalar ishlab chiqildi.
Shu kuni 35 nafar fuqaroga suyultirilgan gaz balonlari topshirildi. 10 ta xonadonga 5 tonna ko‘mir mahsuloti yetkazib berildi.
Mirzaobod mahallasi Mirto‘pi ko‘chasida istiqomat qiluvchi 73 yoshni qarshi olgan onaxon Risolatxon Tojiboyev uzoq yillardan beri nogironlik aravachasiga muhtoj edi. 3-sektor rahbarining topshirig‘iga asosan ushbu fuqaroga nogironlik aravachasi topshirildi.
- Aholi tomonidan bo‘layotgan murojaatlar uyma-uy yurib ham o‘rganilmoqda, - deydi Asaka tumani ichki ishlar bo‘limi boshlig‘i, podpolkovnik Sodiqjon Usmonov. – Murojaatlarning asosiy qismi ishga kirish, pasport olish, mol-mulkni undirish, uy-joy masalalariga oid. Ularning har biri tegishli soha mutaxassisi ishtirokida o‘sha joyning o‘zida yechimini topmoqda. Bundan tashqari fuqarolarga huquqiy maslahatlar va tushuntirishlar berilmoqda.
Shuningdek, sayyor qabul doirasida Asaka oziq-ovqat sanoati kasb-hunar kollejida bo‘sh ish o‘rinlari mehnat yarmarkasi ham o‘tkazildi. Unda o‘ttizdan ortiq korxona, tashkilot va muassasalar o‘zlarida mavjud ish o‘rinlari bilan ishtirok etdi. O‘ndan ortiq ishsiz fuqarolarning bandligi ta’minlandi.
Bunday qabullar viloyatning Andijon, Bo‘z va Ulug‘nor tumanlarida ham o‘tkazildi.
Izoh (0)