O‘zbekiston Respublikasi Oliy Majlisi Senatining o‘n sakkizinchi yalpi majlisida Adliya vaziri Ruslanbek Davletovning 2018-yilda huquqiy targ‘ibot va ma’rifatning holati to‘g‘risidagi axboroti eshitildi, deb yozadi O‘zA.
Ruslanbek Davletov huquqiy targ‘ibotning eskirgan va samarasiz usullaridan butunlay voz kechilayotganini qayd etdi. Targ‘ibot ishiga yangicha yondashuv, innovatsiyalarni faol jalb etilmoqda.
2018-yilda 284 mingdan ortiq xonadonga borib, huquqiy maslahatlar berilgan. 329 mingdan ortiq manzilda targ‘ibot tadbirlari tashkil qilingan.
Targ‘ibot ishlari oldingi davrga nisbatan 4 barobarga ko‘paygan. Shu bilan birga, aholi ko‘p-ko‘p ko‘tarayotgan muammoli masalalar, ya’ni migratsiya, moddiy yordam, yer, uy-joy olish, kommunal xo‘jalik, imtiyozlar, aliment, ishga joylashish, ta’lim olish va boshqalar bo‘yicha huquqiy targ‘ibot jadallashtirilgan.
Bunda oddiy tilda qonunchilikni tushuntirishga e’tibor qaratilib, buklet, flayer, liflet va plakatlar shaklida aholiga 2,5 million nusxada tarqatilgan.
Fuqarolar kundalik hayotida asqotadigan va foydalana oladigan “Hayotiy muhim masalalar bo‘yicha huquqiy qo‘llanma” tayyorlangan. Qo‘llanma oila davrasida huquqiy savodxonlikni oshirishga mo‘ljallangan bo‘lib, unda fuqarolik, mulk, mehnat, ta’lim, soliq va oila qonunchiligiga doir muhim tushunchalar ochib berilgan. Hozirda qo‘llanma oilalarga bosqichma-bosqich bepul tarqatilmoqda.
“Shu fursatdan foydalanib, hurmatli hokimlarimiz bizga shu qo‘llanmani chop etishda ko‘mak bersa, biz minnatdor bo‘lardik. Adliya kuchi bilan 200 ming nusxa tarqatdik, qo‘shimcha yordam ayni muddao bo‘lardi”,– dedi Adliya vaziri.
Xorijiy davlatlar tajribasidan kelib chiqib 2018-yilda huquqiy targ‘ibot ishlarida ommaviy fleshmob va aksiyalar o‘tkazilishi yo‘lga qo‘yildi. Targ‘ibot sohasida zamonaviy axborot texnologiyalari, jumladan, ijtimoiy tarmoqlar imkoniyatidan foydalanish bir necha o‘n barobarga kengaytirildi.
Masalan, Telegram’dagi Adliya vazirligining “Huquqiy axborot” kanali hozirda 137 ming a’zoga ega. Fuqarolarning huquqiy bilimlarini oshirishga bo‘lgan harakatlarni munosib rag‘batlantirish maqsadida tanlovlar va viktorinalar tashkil etish amaliyoti yo‘lga qo‘yildi.
“Maqsad aholiga huquqiy axborotni biz xohlagan paytda emas, balki ular o‘zlari xohlagan paytda olish imkonini yaratishdir. Shu maqsadda Buyuk Britaniya bilan hamkorlikda ‘Citizens Advice’ tarmog‘i asosida fuqarolarga turli sohalar bo‘yicha bepul huquqiy maslahat beradigan ‘Advice.uz’ huquqiy portali yaratilmoqda. Biz mazkur portalni shu yilning aprel oyida ishga tushiramiz”, – dedi Ruslanbek Davletov.
Izoh (0)