O‘zbekiston Respublikasi Oliy Majlisi Senatining o‘n sakkizinchi yalpi majlisi bugun, 1-mart kuni ham o‘z ishini davom ettirmoqda, deb xabar berdi O‘zA.
Yapli majlisda Oliy Majlisning Inson huquqlari bo‘yicha vakili (Ombudsman)ning 2018-yildagi faoliyati to‘g‘risidagi hisoboti eshitildi.
Unda Ombudsman Ulug‘bek Muhammadiyev jazoni ijro etish muassasalari va tergov hibsxonalarida monitoringlar tashkil etilayotgani, bu jarayonda qamoqda saqlanayotgan shaxslar bilan jamoaviy uchrashuvlar va yakka tartibdagi suhbatlar o‘tkazilganini qayd etdi.
2018-yilda qamoqda saqlanayotgan shaxslardan 909 murojaat tushgan, Ombudsman telefon raqamiga ilk marta 30 ta og‘zaki murojaat tushgan.
Hisobot davrida tushgan murojaatlarning 816 tasi sudning hukmiga (725 ta) va tergov tadbirlarining borishiga (91 ta) norozilik bilan bog‘liq bo‘lgan.
Qamoqda saqlanayotgan shaxslar murojaatlarini ko‘rib chiqish natijalari bo‘yicha ularning 15 nafari yaxshi tomonga jiddiy o‘zgargani tufayli shartli ravishda muddatidan oldin ozod etilgan yoki ozodlikni cheklash tarzidagi jazoni o‘tashdan to‘liq ozod etilgan.
Ombudsmanning alohida e’tibori huquqni muhofaza qilish organlari xodimlari tomonidan jinoyatlar sodir etganlikda gumon qilinayotganlarga va mahkumlarga nisbatan noqonuniy ta’sir choralarini qo‘llash to‘g‘risidagi shikoyatlarga qaratilgan. 2018 yilda Ombudsmanga bu borada 101 shikoyat kelib tushgan.
Ushbu shikoyatlarni ko‘rib chiqish uchun protsessual normalarni hisobga olgan holda ular O‘zbekiston Respublikasi Bosh prokuraturasiga va Oliy sudiga yuborilgan. Mazkur shikoyatlarni ko‘rib chiqish natijalari bo‘yicha Bosh prokuratura tomonidan jinoyat ishi qo‘zg‘atish va qo‘shimcha tekshiruv o‘tkazishni rad etish to‘g‘risida 4 ta qaror qabul qilingan. 7 ta shikoyat bo‘yicha xizmat tekshiruvi belgilangan. 49 ta holatda shikoyatda bayon etilgan axborot o‘z tasdig‘ini topmagan, 25 ta murojaat protsessual tartibda sudga yuborilgan va 16 ta murojaat ko‘rib chiqilmoqda.
Hisobot bo‘yicha Oliy Majlis Senati raisining o‘rinbosari Svetlana Ortiqova ma’ruzachiga “Huquqni muhofaza qiluvchi organlar xodimlari tomonidan qiynoqlar bilan bog‘liq shafqatsiz, g‘ayriqonuniy holatlarga hamon yo‘l qo‘yilayotgani O‘zbekiston obro‘siga putur yetkazmoqda. Bu holatlar chek qo‘yish uchun nima yetishmayapti? Bu borada qanday yordam kerak?”, degan savoliga U.Muhammadiyev “Bu borada o‘zaro hamkorlikka asoslangan dasturlar tasdiqlangani, lekin ayrim jihatlari bajarilmagani, 2019-yilda bu alohida e’tiborga olinishi, huquqni muhofaza qiluvchi, xususan, ichki ishlar organlari xodimlari bilan maxsus seminarlar o‘tkazilishini” ma’lum qildi.
Izoh (0)