Misrdagi temiryo‘l halokatlari sababi ma’lum bo‘ldi

Qohiradagi vokzalda poyezdlar to‘qnashuviga, undan so‘ng yoqilg‘i baki yonib, portlab ketishiga ikki poyezd mashinistlarining janjallashgani sabab bo‘lgan. Bu haqda Sputnik xabar berdi.

Lokomotiv mashinisti uning yo‘lini to‘sgan ikkinchi mashinist bilan gaplashib olish uchun kabinadan tushib ketgan.

“Ikkinchi mashinist esa bahslashuvdan qochish uchun orqaga yurgan. Bu payt haydovchisiz qolgan lokomotivning tezligi oshgan. Natijada markaziy Qohira vokzalining asosiy binosidagi to‘xtash joyiga borib urilgan”, — deyiladi xabarda.

Poyezd katta tezlikda Qohira markazidagi Ramzis vokzali platformasiga kelib urilgan. To‘qnashish oqibatida yoqilg‘i bak yonib, portlab ketgan. So‘ngra yong‘in platforma va vagon bo‘ylab tarqalgan.

Mashinist hibsga olingan, Misr Transport vaziri Xisham Arafat esa iste’foga chiqarilgan.

So‘nggi ma’lumotlarga ko‘ra, yong‘in oqibatida 28 kishi halok bo‘lgan va 50 dan ortiq kishi jarohatlangan.

Avvalroq Misrda bir kun ichida 2 marta temiryo‘l halokati sodir bo‘lgani xabar berilgan edi.