25-fevral kuni Sochidan Moskvaga uchayotgan Nordwind aviakompaniyasi bortida moskvalik 16 yoshli yigit infarktoldi holatida bo‘lgan yo‘lovchi umrini saqlab qoldi. Bu haqda “MK.ru” xabar berdi.
Ma’lum bo‘lishicha, tibbiyot maktabi o‘quvchisi bo‘lgan Bogdan onasi bilan Sochidan dam olishdan qaytayotgan bo‘lgan. Shu vaqtda samolyotdagi yo‘lovchilardan birining sog‘lig‘i yomonlashgan va hushini yo‘qotib, burnidan kuchli qon ketgan.
Samolyot bortida tibbiyot xodimlarining yo‘qligi va shifokorlar bilan maslahatlashish uchun yer bilan bog‘lanishning iloji bo‘lmaganligi sababli yigit yordamga shoshilgan.
U yo‘lovchining og‘iz bo‘shlig‘ini qondan tozalab, o‘pka-yurak reanimatsiyasini o‘tkazgan. Bogdanga ikki bort kuzatuvchisi yordamlashgan. Yigit yo‘lovchida infarktoldi holat deb taxmin qilganligi sababli samolyot komandiri yaqinroq aeroportga favqulodda qo‘nishga qaror qilgan.
Samolyot Voronejga qo‘ngan va yo‘lovchi kasalxonaga olib ketilgan.
Izoh (0)