Ichki ishlar vazirining o‘rinbosari Akromxon Boboxonov boshchiligidagi delegatsiya Turkiyaning Istanbul shahrida bo‘lib o‘tgan “Budapesht jarayoni” forumining oltinchi vazirlar konferensiyasida ishtirok etdi. Bu haqda IIV jamoatchilik va OAV bilan aloqalar boshqarmasi xabar berdi.
Konferensiyada migratsiya sohasida faoliyat olib borayotgan xalqaro tashkilotlar hamda Osiyo, Yevropa va Afrikadan 49 ta davlatning tegishli vazirlik rahbarlari va vakillari qatnashdi.
“Budapesht jarayoni” migratsiyani tartibga soluvchi kompleks va barqaror tizimlarni rivojlantirishga qaratilgan ellikdan ziyod davlat va o‘ndan ortiq xalqaro tashkilotlardan tashkil topgan maslahat forumidir. Mazkur forum migratsiya, kochqinlar, vizalar, odam savdosi va qochoqlarni qaytarish masalalari bo‘yicha eng yaxshi harakatlar va ko‘nikmalarni tarqatish uchun tashkil etilgan.
Konferensiyaning ochilishida Turkiya grezidenti Rajab Toyyib Erdo‘g‘on nutq so‘zlab, hozirda noqonuniy migratsiya va xalqaro terrorizm o‘zaro bog‘liqligini ta’kidlab, dunyo miqyosida migratsiya jarayonlarini tartibga solish bo‘yicha qat’iy choralar ko‘rish zarurligiga alohida to‘xtaldi.
Konferensiyada so‘zga chiqqan Akromxon Boboxonov ishtirokchilarni O‘zbekistonda migratsiya sohasida amalga oshirilayotgan ishlar bilan yaqindan tanishtirdi. Bugungi kunda mamlakatda migratsiya jarayonlarini tartibga solish va qoidalarni soddalashtirish, xorijiy fuqarolarni qabul qilish bo‘yicha sezilarli sa’y-harakatlar amalga oshirib kelinayotganligi, migratsiya va u bilan bog‘liq bo‘lgan sohalarga taalluqli 10 ga yaqin farmon va qarorlar qabul qilinganligini ta’kidladi.
Izoh (0)