Ички ишлар вазирининг ўринбосари Акромхон Бобохонов бошчилигидаги делегация Туркиянинг Истанбул шаҳрида бўлиб ўтган «Будапешт жараёни» форумининг олтинчи вазирлар конференциясида иштирок этди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Конференцияда миграция соҳасида фаолият олиб бораётган халқаро ташкилотлар ҳамда Осиё, Европа ва Африкадан 49 та давлатнинг тегишли вазирлик раҳбарлари ва вакиллари қатнашди.
«Будапешт жараёни» миграцияни тартибга солувчи комплекс ва барқарор тизимларни ривожлантиришга қаратилган элликдан зиёд давлат ва ўндан ортиқ халқаро ташкилотлардан ташкил топган маслаҳат форумидир. Мазкур форум миграция, кочқинлар, визалар, одам савдоси ва қочоқларни қайтариш масалалари бўйича энг яхши ҳаракатлар ва кўникмаларни тарқатиш учун ташкил этилган.
Конференциянинг очилишида Туркия грезиденти Ражаб Тоййиб Эрдўғон нутқ сўзлаб, ҳозирда ноқонуний миграция ва халқаро терроризм ўзаро боғлиқлигини таъкидлаб, дунё миқёсида миграция жараёнларини тартибга солиш бўйича қатъий чоралар кўриш зарурлигига алоҳида тўхталди.
Конференцияда сўзга чиққан Акромхон Бобохонов иштирокчиларни Ўзбекистонда миграция соҳасида амалга оширилаётган ишлар билан яқиндан таништирди. Бугунги кунда мамлакатда миграция жараёнларини тартибга солиш ва қоидаларни соддалаштириш, хорижий фуқароларни қабул қилиш бўйича сезиларли саъй-ҳаракатлар амалга ошириб келинаётганлиги, миграция ва у билан боғлиқ бўлган соҳаларга тааллуқли 10 га яқин фармон ва қарорлар қабул қилинганлигини таъкидлади.
Изоҳ (0)