Fevral oyining boshida “Daryo”da Urgut tumanidagi bog‘chada 6 yoshli qizcha arg‘imchoqdan yiqilgach, qarovsiz qolib ketgani, bir kun o‘tib o‘ziga kelmay vafot etgani haqida maqola e’lon qilingan edi. Maktabgacha ta’lim vazirligi Rayhona Orziyevaning o‘limi bo‘yicha batafsil axborot berdi.
O‘zbekiston Maktabgacha ta’lim vazirligi ishchi guruhi tomonidan Samarqand viloyati Urgut tumani 29-sonli maktabgacha ta’lim muassasasi tarbiyalanuvchisi Orziyeva Rayhonoy O‘rinboy qizining o‘limi tafsilotlari har taraflama, joyiga borilgan holda o‘rganildi.
Rayhon Orziyeva 2018-yilning 19-sentabr kuni Urgut tumanining markaziy shifoxonasida vafot etdi. O‘lim sabablarini aniqlash uchun Urgut tumani huquqni muhofaza qilish organlari tomonidan sud-tibbiy ekspertizasi tayinlandi.
2018-yil 29-sentabrdagi 46-sonli sud-tibbiy ekspertizasi xulosasiga ko‘ra, Rayhon Orziyeva miyaga qon quyilishi, bosh suyak asosining sinishi bosh suyakning ichki shikastlanishi natijasida halok bo‘lgan. Miyaga qon quyilishi natijasida bemor biologik komaga tushib qolgan. Zamonaviy tibbiy amaliyotda bunday jarohatlar yashashga imkon bermaydigan jarohatlar hisoblanadi. Hatto, yuqori sifatli tibbiy uskunalardan foydalanganda va jadal jonlantirish choralari qo‘llanilganda ham o‘lim ehtimoli 80–90 foizni tashkil etadi. Tashxis shifokorlar tomonidan to‘g‘ri qo‘yildi. Tashxis va davolash chora-tadbirlari standartlarga mos ravishda amalga oshirildi.
Voqea joyiga borgan Maktabgacha ta’lim vazirligining ishchi guruhi tomonidan quyidagilar aniqlandi:
2018-yil 13-sentabr kuni Orzi Ro‘ziqulov tarbiyachi Viloyat Qurbonovaga nabirasi 29-sonli maktabgacha ta’lim muassasasiga qabul qilinishi uchun Davlat xizmatlari markazi orqali talabnomani rasmiylashtirishga yordam berish yuzasidan murojaat etdi. Ushbu maqsadlarga tarbiyachi yo‘l xarajatlariga 15 ming so‘m oldi (tuman markazigacha bo‘lgan masofa 25–30 kilometrni tashkil etadi). Qizcha MTMga shu kuni yo‘llanmasiz qatnay boshlab, ushbu holat bolalarni davlat maktabgacha ta’lim muassasalariga qabul qilish bo‘yicha davlat xizmatini ko‘rsatish reglamenti qoidalarini buzish hisoblanadi.
2018-yil 18-sentabr kuni taxminan soat 16:20 da tarbiyachi Viloyat Qurbonova bolalarni o‘yin maydonchasiga olib chiqdi, bunda yozgi shiyponchada tushlik o‘tkazish rejalashtirilgan edi. Guruh saflanishi vaqtida Rayhon Orziyeva arg‘imchoqda uchishga ketdi va undan yiqilib, jarohat oldi. Qizchaning yoniga birinchi bo‘lib arg‘imchoq qarshisida ichimlik suvi olayotgan oshpaz yordamchisi Xurshida Muhiddinova va tarbiyachi Dilso‘z Rajabova yugurib keldi. Darhol tez yordam chaqirildi va bu haqda MTMga yaqin joyda joylashgan maktabda ishlovchi qizchaning buvasi Muhammadi Sharipov xabardor qilindi.
Muhammadi Sharipov tarbiyachi Dilso‘z Rajabova bilan birgalikda qizchani mashinada mahalliy vrachlik punktiga olib bordi. 29-sonli MTM hamshirasi shu kuni yillik rejani tasdiqlash uchun maktabgacha ta’lim bo‘limiga ketgan edi. “Xo‘jayduq” mahallasi shifokorlari qizchaga birinchi tibbiy yordam ko‘rsatib, Urgut tumanining markaziy shifoxonasiga yubordi.
Shifoxonaga ketayotgan vaqtda chaqirilgan tez yordam mashinasi uchratilib, unda qizchaga tez yordam ko‘rsatishda davom etishdi. Joyida qizcha jonlantirish bo‘limiga joylashtirildi. Taxminan soat 20:00 da nabirasi oldida bo‘lgan Muhammadi Sharipov qudasi Orzi Ro‘ziqulovni ro‘y bergan voqea bo‘yicha xabardor etib, kelishini so‘radi. Shifokorlar Orzi Ro‘ziqulovga operatsiya amalga oshirish to‘g‘risida o‘z vaqtida xabar berdilar va o‘lim ehtimoli haqida ogohlantirdilar. Rayhonoy Orziyevaning buvasi operatsiyani rad etib, ushbu holat uning yozgan tilxati va tuzilgan dalolatnoma bilan tasdiqlanadi.
2018-yilning 26-sentabr kuni Samarqand viloyati maktabgacha ta’lim boshqarmasi ro‘y bergan voqea yuzasidan xabarnoma oldi. Maktabgacha ta’lim vazirligiga Rayhonoy Orziyevaning o‘limi haqida xabar berilmadi. 2018-yilning 11-oktabrida xizmat tekshiruvi tayinlanib, uning natijalariga ko‘ra:
- Rayhon Orziyeva va boshqa bolalarni yo‘llanmasiz qabul qilganlik hamda ko‘rsatgan beparvolik va ma’suliyatsizlik uchun 29-sonli MTM mudiri M.R. Tursunova bilan tuzilgan shartnoma bir taraflama bekor qilindi (O‘zbekiston Respublikasi Mehnat kodeksining 100-moddasi 4-bandi – xodimning o‘z mehnat vazifalarini bir marta qo‘pol ravishda buzganligi);
- arizalarga asosan tarbiyachi Viloyat Qurbonova va tarbiyachi yordamchisi X. Ashurova bilan tuzilgan mehnat shartnomalari bekor qilindi (Mehnat kodeksining 99-moddasi – mehnat shartnomasini xodimning tashabbusi bilan bekor qilish).
2018-yilning 18-oktabrida Urgut tumani IIB tergov ishlari natijalariga ko‘ra tergov ishini qo‘zg‘atishni rad etdi (O‘zbekiston Respublikasi Jinoyat-protsessual kodeksining 83-moddasi 2-bandi – jinoyat tarkibining bo‘lmasligi).
2018-yilning 20-noyabrida ish materiallari qo‘shimcha tergov harakatlarini amalga oshirish uchun Urgut tumani prokuraturasi tomonidan IIBning tergov bo‘limiga topshirildi.
2019-yilning 8-yanvarida Urgut tumani IIB tergov ishini Jinoyat-protsessual kodeksining 83-moddasi 2-bandiga (jinoyat tarkibining bo‘lmasligi) muvofiq yopdi.
2019-yilning 2-fevralida mazkur ishni yopish to‘g‘risidagi qaror Urgut tumani prokuraturasi tomonidan bekor qilindi. Ayni paytda tergov harakatlari olib borilmoqda.
Maktabgacha ta’lim vazirligi Orziyeva Rayhonoy O‘rinboy qizi oilasiga hamdardlik bildirib qoladi.
“Biz farzandlarimiz xavfsizligini ta’minlash va baxtsiz hodisalar sonini mumkin qadar qisqartirish uchun birinchi kundan boshlab MTM xodimlari mas’uliyatliligi va o‘z ishini bilishi ustida ishlamoqdamiz. Biz maktabgacha ta’lim muassasalari har jihatdan qulay va xavfsiz bo‘lishi uchun bizga bog‘liq barcha harakatlarni amalga oshirishda davom etamiz”, — deyiladi MTV axborotida.
Izoh (0)