Moliya vazirligi “Mehnatga haq to‘lash, pensiya, nafaqa va boshqa to‘lovlar miqdorini aniqlash tartibini takomillashtirish to‘g‘risida”gi Prezident farmoni loyihasini tayyorladi.
Hujjat ish haqi miqdorini aniqlash tartibini takomillashtirish, mehnatga haq to‘lash, pensiyalar belgilash va jarima hamda yig‘imlar undirish o‘rtasida bog‘liqlik shartini yo‘qotish maqsadida qabul qilinadi.
Prezident farmoni loyihasiga muvofiq, 2018-yilning 1-iyulidan: mehnatga haq to‘lashning eng kam miqdori (MHEKM) 577 170 so‘m; bazaviy hisoblangan summa (BHS) - 202 730 so‘m; hisoblangan pensiya ko‘rsatkichi (HPK) - 202 730 so‘mni tashkil qiladi.
Farmon loyihasiga ko‘ra, mehnatga haq to‘lashning eng kam miqdori mutlaq summada belgilanadi va “1,0” tarif koeffitsiyenti bilan Mehnatga haq to‘lashning yagona tarif setkasi birinchi razryadi oylik tarif stavkasi sondagi qiymati sanaladi.
Bundan tashqari, mehnatga haq to‘lashning eng kam miqdori lavozim maoshi, ustama, qo‘shimcha pul, gonorarlar, qo‘shimcha ish uchun kompensatsiya to‘lovlari, oziq-ovqat, yo‘l va rag‘batlantiruvchi boshqa turdagi to‘lovlar, ish haqini hisoblashda qo‘llaniladigan chegara miqdor, qonunchilik bilan belgilangan chegirib qolish hamda ish haqi miqdoriga bog‘liq bo‘lgan boshqa to‘lovlar aniqlash maqsadida mehnat munosabatlari sohasida qo‘llaniladi.
Shuningdek, mehnatga haq to‘lashning eng kam miqdori egalik shakli va mehnat munosabatlaridan qat’i nazar, belgilangan mehnat normalarini to‘liq bajargan ishchilar mehnatiga haq to‘lashning past chegarasi sifatida barcha ish beruvchilar uchun majburiy bo‘ladi.
Bazaviy hisoblangan summa soliqlar, yig‘imlar, jarimalar, davlat bojlari, stipendiyalar va taqdim etiladigan davlat xizmatlari uchun boshqa to‘lovlar miqdorini aniqlash, shuningdek, oilaning ijtimoiy qo‘llab-quvvatlovga muhtojligini aniqlashda qo‘llaniladi.
Shuningdek, bazaviy hisoblangan summa patent, litsenziya va ma’lum bir turdagi tadbirkorlik faoliyatini amalga oshirish uchun boshqa to‘lovlar, tashkilotlar ustav va boshqa fondlari (kapital) miqdori, pul mablag‘larisiz to‘lanuvchi aksiyalar qiymati, boshqa qimmatli qog‘ozlar, jamiyatlar aktivlari balans qiymati, mikrokreditlar hamda lizing chegara miqdori, shuningdek, boshqa moliyaviy-iqtisodiy ko‘rsatkichlar bazasi sifatida qo‘llaniladi.
Farmon loyihasida Bandlik va mehnat munosabatlari, Moliya, Adliya vazirliklari tomonidan ikki oy muddatda Mehnatga haq to‘lash bo‘yicha yagona tarif setkasini qayta ko‘rib chiqish hamda mutlaq summada nafaqalar, kompensatsiyalar va to‘lovlar alohida turlari miqdorini o‘rnatish bo‘yicha takliflarni Vazirlar Mahkamasiga kiritish haqida topshiriq qayd etilgan.
Hujjat loyihasi 9-martgacha muhokama qilinadi.
Izoh (0)