Февраль ойининг бошида «Дарё»да Ургут туманидаги боғчада 6 ёшли қизча арғимчоқдан йиқилгач, қаровсиз қолиб кетгани, бир кун ўтиб ўзига келмай вафот этгани ҳақида мақола эълон қилинган эди. Мактабгача таълим вазирлиги Райҳона Орзиеванинг ўлими бўйича батафсил ахборот берди.
Ўзбекистон Мактабгача таълим вазирлиги ишчи гуруҳи томонидан Самарқанд вилояти Ургут тумани 29-сонли мактабгача таълим муассасаси тарбияланувчиси Орзиева Райҳоной Ўринбой қизининг ўлими тафсилотлари ҳар тарафлама, жойига борилган ҳолда ўрганилди.
Райҳон Орзиева 2018 йилнинг 19 сентябрь куни Ургут туманининг марказий шифохонасида вафот этди. Ўлим сабабларини аниқлаш учун Ургут тумани ҳуқуқни муҳофаза қилиш органлари томонидан суд-тиббий экспертизаси тайинланди.
2018 йил 29 сентябрдаги 46-сонли суд-тиббий экспертизаси хулосасига кўра, Райҳон Орзиева мияга қон қуйилиши, бош суяк асосининг синиши бош суякнинг ички шикастланиши натижасида ҳалок бўлган. Мияга қон қуйилиши натижасида бемор биологик комага тушиб қолган. Замонавий тиббий амалиётда бундай жароҳатлар яшашга имкон бермайдиган жароҳатлар ҳисобланади. Ҳатто, юқори сифатли тиббий ускуналардан фойдаланганда ва жадал жонлантириш чоралари қўлланилганда ҳам ўлим эҳтимоли 80–90 фоизни ташкил этади. Ташхис шифокорлар томонидан тўғри қўйилди. Ташхис ва даволаш чора-тадбирлари стандартларга мос равишда амалга оширилди.
Воқеа жойига борган Мактабгача таълим вазирлигининг ишчи гуруҳи томонидан қуйидагилар аниқланди:
2018 йил 13 сентябрь куни Орзи Рўзиқулов тарбиячи Вилоят Қурбоновага набираси 29-сонли мактабгача таълим муассасасига қабул қилиниши учун Давлат хизматлари маркази орқали талабномани расмийлаштиришга ёрдам бериш юзасидан мурожаат этди. Ушбу мақсадларга тарбиячи йўл харажатларига 15 минг сўм олди (туман марказигача бўлган масофа 25–30 километрни ташкил этади). Қизча MTMга шу куни йўлланмасиз қатнай бошлаб, ушбу ҳолат болаларни давлат мактабгача таълим муассасаларига қабул қилиш бўйича давлат хизматини кўрсатиш регламенти қоидаларини бузиш ҳисобланади.
2018 йил 18 сентябрь куни тахминан соат 16:20 да тарбиячи Вилоят Қурбонова болаларни ўйин майдончасига олиб чиқди, бунда ёзги шийпончада тушлик ўтказиш режалаштирилган эди. Гуруҳ сафланиши вақтида Райҳон Орзиева арғимчоқда учишга кетди ва ундан йиқилиб, жароҳат олди. Қизчанинг ёнига биринчи бўлиб арғимчоқ қаршисида ичимлик суви олаётган ошпаз ёрдамчиси Хуршида Муҳиддинова ва тарбиячи Дилсўз Ражабова югуриб келди. Дарҳол тез ёрдам чақирилди ва бу ҳақда MTMга яқин жойда жойлашган мактабда ишловчи қизчанинг буваси Муҳаммади Шарипов хабардор қилинди.
Муҳаммади Шарипов тарбиячи Дилсўз Ражабова билан биргаликда қизчани машинада маҳаллий врачлик пунктига олиб борди. 29-сонли MTM ҳамшираси шу куни йиллик режани тасдиқлаш учун мактабгача таълим бўлимига кетган эди. «Хўжайдуқ» маҳалласи шифокорлари қизчага биринчи тиббий ёрдам кўрсатиб, Ургут туманининг марказий шифохонасига юборди.
Шифохонага кетаётган вақтда чақирилган тез ёрдам машинаси учратилиб, унда қизчага тез ёрдам кўрсатишда давом этишди. Жойида қизча жонлантириш бўлимига жойлаштирилди. Тахминан соат 20:00 да набираси олдида бўлган Муҳаммади Шарипов қудаси Орзи Рўзиқуловни рўй берган воқеа бўйича хабардор этиб, келишини сўради. Шифокорлар Орзи Рўзиқуловга операция амалга ошириш тўғрисида ўз вақтида хабар бердилар ва ўлим эҳтимоли ҳақида огоҳлантирдилар. Райҳоной Орзиеванинг буваси операцияни рад этиб, ушбу ҳолат унинг ёзган тилхати ва тузилган далолатнома билан тасдиқланади.
2018 йилнинг 26 сентябрь куни Самарқанд вилояти мактабгача таълим бошқармаси рўй берган воқеа юзасидан хабарнома олди. Мактабгача таълим вазирлигига Райҳоной Орзиеванинг ўлими ҳақида хабар берилмади. 2018 йилнинг 11 октябрида хизмат текшируви тайинланиб, унинг натижаларига кўра:
- Райҳон Орзиева ва бошқа болаларни йўлланмасиз қабул қилганлик ҳамда кўрсатган бепарволик ва маъсулиятсизлик учун 29-сонли MTM мудири М.Р. Турсунова билан тузилган шартнома бир тарафлама бекор қилинди (Ўзбекистон Республикаси Меҳнат кодексининг 100-моддаси 4-банди – ходимнинг ўз меҳнат вазифаларини бир марта қўпол равишда бузганлиги);
- аризаларга асосан тарбиячи Вилоят Қурбонова ва тарбиячи ёрдамчиси Х. Ашурова билан тузилган меҳнат шартномалари бекор қилинди (Меҳнат кодексининг 99-моддаси – меҳнат шартномасини ходимнинг ташаббуси билан бекор қилиш).
2018 йилнинг 18 октябрида Ургут тумани ИИБ тергов ишлари натижаларига кўра тергов ишини қўзғатишни рад этди (Ўзбекистон Республикаси Жиноят-процессуал кодексининг 83-моддаси 2-банди – жиноят таркибининг бўлмаслиги).
2018 йилнинг 20 ноябрида иш материаллари қўшимча тергов ҳаракатларини амалга ошириш учун Ургут тумани прокуратураси томонидан ИИБнинг тергов бўлимига топширилди.
2019 йилнинг 8 январида Ургут тумани ИИБ тергов ишини Жиноят-процессуал кодексининг 83-моддаси 2-бандига (жиноят таркибининг бўлмаслиги) мувофиқ ёпди.
2019 йилнинг 2 февралида мазкур ишни ёпиш тўғрисидаги қарор Ургут тумани прокуратураси томонидан бекор қилинди. Айни пайтда тергов ҳаракатлари олиб борилмоқда.
Мактабгача таълим вазирлиги Орзиева Райҳоной Ўринбой қизи оиласига ҳамдардлик билдириб қолади.
«Биз фарзандларимиз хавфсизлигини таъминлаш ва бахтсиз ҳодисалар сонини мумкин қадар қисқартириш учун биринчи кундан бошлаб MTM ходимлари масъулиятлилиги ва ўз ишини билиши устида ишламоқдамиз. Биз мактабгача таълим муассасалари ҳар жиҳатдан қулай ва хавфсиз бўлиши учун бизга боғлиқ барча ҳаракатларни амалга оширишда давом этамиз», — дейилади МТВ ахборотида.
Изоҳ (0)