Qozog‘iston energetika vazirining o‘rinbosari Sabit Nurlibay Orol dengizini saqlab qolish bo‘yicha o‘zbek tomoni bilan birgalikda olib borilgan ishlar haqida so‘zlab berdi. Bu haqda “Kazinform” xabar berdi.
“Sizga ma’lumki, Orol muammosi SSSR davridan aktual hisoblanadi. O‘sha paytda sug‘oriladigan yerlarni kengaytirish ishi boshlangan, natijada bugungiday Orol dengizining qurishi muammosi kabi baxtsiz oqibatlar yuzaga kelgan. Bugungi kunda quruq dengiz tubidan har yili havoda millionlab tonna tuz tarqaladi. Dengizning qurishi mintaqaning ekologiyasi uchun salbiy oqibatlarga olib keldi”, — dedi Sabit Nurlibay Orol dengizi havzasining iqtisodiy, ekologik va ijtimoiy masalalarini tartibga solish bo‘yicha davra suhbati davomida.
Vazir o‘rinbosari hukumatlararo shartnomalar doirasida ushbu muammolarni qo‘shni davlatlar bilan hal qilish bo‘yicha ishlar olib borilayotganini ta’kidladi.
“1997-yilda O‘zbekiston va Qozog‘iston atrof-muhitni muhofaza qilish sohasida hukumatlararo bitim imzolagan, komissiya tuzilgan. Afsuski, 20 yil davomida bu komissiya hech qachon hech qanday tadbirlar o‘tkazmagan. O‘tgan yili sentabr oyida Toshkentga tashrif buyurdim, atrof muhitni muhofaza qilish va suv sifati bo‘yicha birgalikda ishchi guruh tuzdik. Birinchidan, uning tarkibini tasdiqladik. Ikkinchidan, biz O‘zbekiston—Qozog‘iston qo‘shma ishchi guruhi qo‘shma nizomini tasdiqladik. Uchinchidan, yaqin uch yillik ish rejasini tuzdik. Ya’ni biz bu borada ish boshladik va komissiyaning birinchi yig‘ilishini o‘tkazdik”, — deya qo‘shimcha qildi Sabit Nurlibay.
Izoh (0)