Ўзбекистон ва Қозоғистон 20 йил мобайнида фаол бўлмаган Орол бўйича комиссия ишини тиклади
Қозоғистон энергетика вазирининг ўринбосари Сабит Нурлибай Орол денгизини сақлаб қолиш бўйича ўзбек томони билан биргаликда олиб борилган ишлар ҳақида сўзлаб берди. Бу ҳақда «Казинформ» хабар берди.
«Сизга маълумки, Орол муаммоси СССР давридан актуал ҳисобланади. Ўша пайтда суғориладиган ерларни кенгайтириш иши бошланган, натижада бугунгидай Орол денгизининг қуриши муаммоси каби бахтсиз оқибатлар юзага келган. Бугунги кунда қуруқ денгиз тубидан ҳар йили ҳавода миллионлаб тонна туз тарқалади. Денгизнинг қуриши минтақанинг экологияси учун салбий оқибатларга олиб келди», — деди Сабит Нурлибай Орол денгизи ҳавзасининг иқтисодий, экологик ва ижтимоий масалаларини тартибга солиш бўйича давра суҳбати давомида.
Вазир ўринбосари ҳукуматлараро шартномалар доирасида ушбу муаммоларни қўшни давлатлар билан ҳал қилиш бўйича ишлар олиб борилаётганини таъкидлади.
«1997 йилда Ўзбекистон ва Қозоғистон атроф-муҳитни муҳофаза қилиш соҳасида ҳукуматлараро битим имзолаган, комиссия тузилган. Афсуски, 20 йил давомида бу комиссия ҳеч қачон ҳеч қандай тадбирлар ўтказмаган. Ўтган йили сентябрь ойида Тошкентга ташриф буюрдим, атроф муҳитни муҳофаза қилиш ва сув сифати бўйича биргаликда ишчи гуруҳ туздик. Биринчидан, унинг таркибини тасдиқладик. Иккинчидан, биз Ўзбекистон—Қозоғистон қўшма ишчи гуруҳи қўшма низомини тасдиқладик. Учинчидан, яқин уч йиллик иш режасини туздик. Яъни биз бу борада иш бошладик ва комиссиянинг биринчи йиғилишини ўтказдик», — дея қўшимча қилди Сабит Нурлибай.
