Toshkent shahrida kuniga ikki ming, yiliga 700 ming tonna, respublika bo‘yicha esa yiliga 7—8 million tonna maishiy chiqindi hosil bo‘ladi, deb yozadi O‘zA.
Ularning bor yo‘g‘i 4—5 foizigina qayta ishlanmoqda. Dunyoning yirik shaharlarida esa bu ko‘rsatkich 15—20 foizni tashkil etadi.
“Shu bois, chiqindilarni saralangan holda topshirish tizimini yo‘lga qo‘yish lozim. Bunda ekologik loyihalar doirasidagi targ‘ibot tadbirlari va amaliy muloqot kelgusida ijobiy samara berishi shubhasiz”, — dedi Ekologiya va atrof-muhitni muhofaza qilish davlat qo‘mitasi raisi o‘rinbosari O‘ktam O‘tayev.
Uning aytishicha, 11—17-mart kunlari Toshkent shahrida o‘tkazilishi rejalashtirilayotgan “Hashar week” loyihasini amalga oshirishdan ko‘zlangan maqsad ham aholining keng qatlami, shu jumladan, hukumat, nodavlat notijorat tashkilotlari, xususiy korxonalarning e’tiborini atrof-muhitga ehtiyotkorona munosabatda bo‘lish, xususan chiqindilarni boshqarish masalasida ularning xabardorligini oshirish, chiqindilarni saralash madaniyatini shakllantirish hisoblanadi.
Izoh (0)