Xalqaro moliya korporatsiyasining Lotin Amerikasi, Karib havzasi, Yevropa va Markaziy Osiyo bo‘yicha vitse-prezidenti Jorjina Beyker boshchiligidagi delegatsiya O‘zbekistonda bo‘lib turibdi. Bu haqda O‘zA xabar berdi.
Tashrif doirasida Toshkentda Jahon banki guruhi tomonidan O‘zbekistonda xususiy sektorni o‘rganish bo‘yicha olib borilgan ishlar natijasiga bag‘ishlangan taqdimot o‘tkazildi. Unda mamlakatning tegishli vazirlik va idoralari, xususiy tarmoqlar vakillari, Xalqaro moliya korporatsiyasi, Jahon banki ekspertlari ishtirok etdi.
Tadbirda ta’kidlanganidek, O‘zbekistonning tabiiy resurslarga boyligi, jumladan, kimyo sanoatini jadal taraqqiy ettirish uchun asosiy omil hisoblanadi. Shu bois sohaning raqobatbardoshligi va energetik ta’sirchanligini oshirishga qaratilgan modernizatsiya ishlarini izchillik bilan olib borish zarur. Buning natijasida O‘zbekiston 2022-yilga kelib kimyo mahsulotlarini import qiladigan mamlakatdan eksportyor davlatga aylanishi mumkin. Investitsiya siyosati tufayli ayni turdagi mahsulotlar bo‘yicha eksport hajmini 600 million AQSh dollariga yetkazish istiqbollari bor.
Shuningdek, hisobotda raqamli iqtisodiyotga o‘tishni jadallashtirish axborot-kommunikatsiya texnologiyalari tarmog‘ini xalqaro me’yorlar darajasida rivojlantirishga bog‘liqligi qayd etiladi. Sohada davlat ulushining kamaytirilishi va to‘g‘ridan-to‘g‘ri investitsiyalar jalb qilinishi birlamchi vazifa sifatida ko‘rsatiladi.
O‘zbekistonning yillik meva-sabzavot eksporti hajmi 1 milliard AQSh dollarini tashkil etadi. Tahlil mualliflarining fikricha, O‘zbekistonning geografik joylashuvi va qulay iqlim sharoiti e’tiborga olinganda bu ko‘rsatkich ayni tarmoq bo‘yicha salohiyatga mos emas.
Taqdimotda Jorjina Beyker ushbu tarmoqlarda xususiy sektor ishtirokini oshirish evaziga O‘zbekiston istiqbolda Markaziy Osiyoning investitsiya va savdo markaziga aylanishi mumkinligini qayd etdi.
Xalqaro moliya korporatsiyasi delegatsiyasining O‘zbekistonga tashrifi davom etmoqda.
Izoh (0)