Халқаро молия корпорациясининг Лотин Америкаси, Кариб ҳавзаси, Европа ва Марказий Осиё бўйича вице-президенти Жоржина Бейкер бошчилигидаги делегация Ўзбекистонда бўлиб турибди. Бу ҳақда ЎзА хабар берди.
Ташриф доирасида Тошкентда Жаҳон банки гуруҳи томонидан Ўзбекистонда хусусий секторни ўрганиш бўйича олиб борилган ишлар натижасига бағишланган тақдимот ўтказилди. Унда мамлакатнинг тегишли вазирлик ва идоралари, хусусий тармоқлар вакиллари, Халқаро молия корпорацияси, Жаҳон банки экспертлари иштирок этди.
Тадбирда таъкидланганидек, Ўзбекистоннинг табиий ресурсларга бойлиги, жумладан, кимё саноатини жадал тараққий эттириш учун асосий омил ҳисобланади. Шу боис соҳанинг рақобатбардошлиги ва энергетик таъсирчанлигини оширишга қаратилган модернизация ишларини изчиллик билан олиб бориш зарур. Бунинг натижасида Ўзбекистон 2022 йилга келиб кимё маҳсулотларини импорт қиладиган мамлакатдан экспортёр давлатга айланиши мумкин. Инвестиция сиёсати туфайли айни турдаги маҳсулотлар бўйича экспорт ҳажмини 600 миллион АҚШ долларига етказиш истиқболлари бор.
Шунингдек, ҳисоботда рақамли иқтисодиётга ўтишни жадаллаштириш ахборот-коммуникация технологиялари тармоғини халқаро меъёрлар даражасида ривожлантиришга боғлиқлиги қайд этилади. Соҳада давлат улушининг камайтирилиши ва тўғридан-тўғри инвестициялар жалб қилиниши бирламчи вазифа сифатида кўрсатилади.
Ўзбекистоннинг йиллик мева-сабзавот экспорти ҳажми 1 миллиард АҚШ долларини ташкил этади. Таҳлил муаллифларининг фикрича, Ўзбекистоннинг географик жойлашуви ва қулай иқлим шароити эътиборга олинганда бу кўрсаткич айни тармоқ бўйича салоҳиятга мос эмас.
Тақдимотда Жоржина Бейкер ушбу тармоқларда хусусий сектор иштирокини ошириш эвазига Ўзбекистон истиқболда Марказий Осиёнинг инвестиция ва савдо марказига айланиши мумкинлигини қайд этди.
Халқаро молия корпорацияси делегациясининг Ўзбекистонга ташрифи давом этмоқда.
Изоҳ (0)