Ingliz tilini bilish darajasi bo‘yicha xalqaro reytingda o‘rganilgan 88 ta davlatdan O‘zbekiston 86-o‘rinda, Osiyoda esa o‘rganilgan davlatlar orasida oxirgi o‘rinda qayd etildi. Bu haqda UZ24 xabar berdi.
O‘tkazilgan tahlillar natijasida mamlakatda ingliz tilini bilish darajasi bilan, u yerdagi turmush darajasi, aholi daromadlari, xizmatlar eksporti, ilmiy salohiyat, kadrlar raqobatbardoshligi kabi qator ko‘rsatkichlar orasida ijobiy bog‘liqlik borligi aniqlangan.
Bu yo‘nalishda esa eng asosiy qadamlardan biri, bu hozirgi kundagi holatni o‘rganish, ayniqsa o‘qituvchilarning ingliz tilini bilish darajalarini xolis baholashdir, deb yozadi Xalq ta’limi vaziri Sherzod Shermatov o‘zining ijtimoiy tarmoqdagi sahifasida.
Vazirning ma’lum qilishicha, IELTS, TOEFL kabi xalqaro imtihonlarni barcha o‘qituvchilarda o‘tkazish juda qimmatga tushishi hisobga olinib, Shvetsiyaning EF kompaniyasi yordamida barcha o‘qituvchilarni bepul bilimini baholash bo‘yicha kelishuvga erishilgan.
Ushbu imtihonlar natijalari xalqaro CEFR darajalari bilan mos keladi. Bundan so‘ng, ingliz tili o‘qituvchilarining malakasini oshirish bo‘yicha aniq dastur ishlab chiqiladi.
Izoh (0)