Bugun, 6-fevral kuni bo‘lib o‘tgan Xalqaro press klub sessiyasida tadbirkorlik va bank sohasidagi muammolar muhokama qilindi, deb xabar berdi “Daryo” muxbiri Sevara Nishonova.
Sessiyada spiker sifatida ishtirok etgan Oliy Majlis Senatining budjet va iqtisodiy islohotlar qo‘mitasi raisi Muhammadjon Jumageldiyev bank tizimidagi oldin qabul qilingan, lekin ishlamayotgan qonunlar haqida gapirdi.
Bugungi qonunlarimiz, ya’ni oldin qabul qilingan qonunlar to‘g‘ridan to‘g‘ri amal qiladigan, ahamiyatga ega bo‘lgan qonunlar emas. Ular chet el investitsiyalarini jalb qilishga ham to‘sqinlik qiladi. Bitta qonunning tagida yuztalab normativ hujjat, qonunosti hujjatlari bo‘lgan. Bu masala Prezidentimiz tomonidan eng asosiy vazifa sifatida bizning oldimizga qo‘yildi. Oliy Majlis Senati, shu jumladan bizning budjet va iqtisodiy islohotlar qo‘mitasi ham ish rejamizni qayta ko‘rib chiqdik.Birinchidan, hozirda amalda bo‘lgan bevosita bizning qo‘mitamizga aloqador bo‘lgan qonunlarni o‘rganib chiqmoqchimiz. Bugungi kunda 80 tadan ortiq qonun qo‘mitamizga aloqador. Shularni qayta ko‘rib chiqib, samarasiz faoliyat yuritayotgan qonunlarni bekor qilib, ularni yangi tahrirda qabul qilishni rejalashtirmoqdamiz. Ularni to‘g‘ridan to‘g‘ri amal qiladigan qonun holiga keltirish niyatidamiz. Bu yilgi rejamizdan juda ko‘p bank moliya tizimidagi qonunlarni qayta qabul qilishni ko‘zlaganmiz. Xususan, ‘Markaziy bank to‘g‘risida’gi qonun, ‘Banklar va bank faoliyati’ to‘g‘risidagi qonun, ‘Valyutani liberallashtirish to‘g‘risida’gi qonun, ‘To‘lovlar va to‘lov tizimi tog‘risida’gi qonun, ‘Iste‘mol kreditlari to‘g‘risida’gi qonunlar. ‘To‘lovlar va to‘lov tizimi tog‘risida’gi qonun yangidan qabul qilinadi. Qolganlari esa tahrirlanadi.
‘Sug‘urta faoliyati to‘g‘risida’gi qonun o‘z samarasini bermayapti. Shuning uchun bu qonunning Moliya vazirligi tomonidan bajarilishi jarayoni bilan tanishish uchun vazirlik rahbariyati hisobotini eshitishni maqsad qilganmiz.
2019-yilda iqtisodiyotni boshqarishda davlat rolini kamaytirishga bag‘ishlangan seminar o‘tkazishni ham rejalashtirganmiz.
Muhammadjon Jumageldiyev, Oliy Majlis Senati budjet va iqtisodiy islohotlar qo‘mitasi raisi
Izoh (0)