Bankomatlar, televizorlar, sotuvchisiz savdo do‘konlari: Toshkent metrosidagi qulayliklar

– Jamiyatimizda har bir fuqaroning o‘z o‘rni bor, ularga qulaylik va imkoniyatlar yaratish bizning vazifamiz, – deydi “Toshkent metropoliteni” unitar korxonasi harakat xizmatining tijorat ishlari bo‘yicha boshliq o‘rinbosari Elmurod Valiyev. – Bugun metroning har bir bekatida uyali aloqa va kommunal to‘lovlarni amalga oshirish uchun maxsus bankomatlar o‘rnatilgan. Foydalanuvchilar uchun qulay 3 ta bekatda (“Buyuk ipak yo‘li”, “Beruniy” va “Chilonzor” va “O‘zbekiston” yo‘nalishlarining almashinuv joyida) plastik kartalarni naqd pul qilish uchun ham maxsus apparatlar ham o‘rnatilgan. Bundan tashqari, poyezd kutuvchilar zerikib qolmasliklari uchun har bir bekatda muntazam ishlovchi televizor o‘rnatilgan. Birinchi marotaba bu xizmatdan foydalanuvchilar uchun esa tushunarli va sodda xaritalar bekat atrofida, poyezd ichi va tashqari tarafdagi devorlarga rangdor yozuvlar bilan yozib qo‘yilgan rasmlari osilgan. Hozir metro ichida sotuvchisiz maxsus savdo do‘konchalari ham mavjud. Ayni vaqtda “Toshkent metropoliteni” unitar korxonasi bu kabi imkoniyat va qulayliklarni yanada kengaytirish choralarini ko‘rmoqda.