Qirg‘izistonlik siyosatchi, jamoat arbobi Azimbek Beknazarov davlat tili ahvolini yaxshilash zarurligini aytib parlament, hukumat va Prezidentga murojaat yo‘lladi. Bu haqda O‘zA xabar bermoqda.
Jumladan, uning bayonot berishicha, 2000-yilda Konstitutsiyaga rasmiy til to‘g‘risidagi normalar kiritilgandan so‘ng qirg‘iz tilining ahvoli yomonlashib ketgan. Murojaatda misol sifatida reklamalar keltirilgan, mualliflarning fikricha, reklamalar asosan rus, ingliz, arab, koreys va xitoy tillarida ekan.
Azimbek Beknazarov ham imzo chekkan murojaat mualliflarning fikricha, davlat xizmatlariga ishga olayotganda xodimlarning davlat tilini bilishi asosiy shart bo‘lishi, davlat tili bo‘yicha komissiya bilan hamkorlikda reklama matnlarini tartibga solish kerak ekan. Bundan tashqari, murojaatda qirg‘iz tilini bilmaydigan amaldorlar uchun hozircha 5,5 ming som (80 dollarga yaqin) jarima solish taklifi berilgan.
Bundan avval jamoat, siyosiy va vatanparvar kuchlar qurultoyi ijroiya qo‘mitasi tomonidan konstitutsiyaviy islohotlar o‘tkazish to‘g‘risidagi qonun loyihasi tayyorlangani, unga ko‘ra 2019-yilning noyabrida referendum o‘tkazilishi taklif qilingani haqida ma’lum qilingan edi. Referendumga Konstitutsiyadan rus tili Qirg‘iziston Respublikasida rasmiy til ekani borasidagi normalar olib tashlanishi ham kiritiladi. Mazkur jamoat, siyosiy va vatanparvar kuchlarning vakili Azimbek Beknazarov rus tilini rasmiy maqomdan mahrum qilish lozimligini ilgari surar ekan, rus tili xuddi ingliz tili singari xalqaro til bo‘lishi lozimligini aytgan edi.
Konstitutsiyaga ko‘ra, Qirg‘izistonda rus tiliga rasmiy maqom berilgan. Hujjatlar va shaharlarda xizmatlar qisman rus tilida olib borilishi jamiyatning ma’lum tabaqalarida noroziliklarni keltirib chiqarmoqda.
Izoh (0)