14-yanvar Vatan himoyachilari kuni munosabati bilan Samarqand viloyati hokimligi va viloyat IIB rahbariyati xizmat vaqtida halok bo‘lgan, yo‘l-patrul xizmati inspektori bo‘lib ishlagan marhum Ibrohim Nishonov oilasidan xabar oldi. Bu haqda “Daryo” muxbiri Farhod Norbo‘tayev xabar bermoqda.
Marhum Ibrohim Nishonov O‘zbekiston Prezidentining 2019-yil 11-yanvar kunidagi farmoniga binoan “Jasorat” medali bilan taqdirlandi.
O‘z kasbining fidoyisi Ibrohim Nishonov 2018-yilning may oyida o‘z xizmat vazifasini o‘tayotgan vaqtda halokatga uchragan. Viloyat hokimligi va bir guruh IIB xodimlari marhumning xonadoniga tashrif buyurib, oila a’zolari, farzandlari holidan xabar olib, ularga boshqarmaning ro‘zg‘or uchun kerakli bo‘lgan oziq-ovqat mahsulotlari, turli sovg‘alar bilan birgalikda fidokorona xizmatlari uchun “Jasorat” medalini topshirdi.Shirin Normatova, Samarqand viloyati IIB matbuot xizmati rahbari
2018-yil 24-may kuni soat 12:05 da Samarqand viloyatining Payariq tumanida yo‘l-patrul xizmati inspektori Ibrohim Nishonov Damas mashinasini haydovchi telefonda gaplashib kelayotganligi sababli to‘xtatgan. Haydovchi S.Sh. to‘xtash ishorasiga bo‘ysunmay, harakatni davom ettirgan. O‘shanda IIV Damas haydovchisi Nishonovni qasddan urib yuborib, voqea joyidan qochib ketganini xabar qilgandi. Ibrohim Nishonov olgan jarohatlari oqibatida kasalxonada vafot etgan.
Damas haydovchisi S.Sh. Jinoyat kodeksining 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish odam o‘lishiga sabab bo‘lishi), 117-moddaning 2-qismi (odam o‘limiga sabab bo‘lgan xavf ostida qoldirish) bilan aybdor deb topildi. S.Sh.ga uch yil muddatga transport vositalarini boshqarish huquqidan mahrum qilinib, har oylik ish haqining 20 foizini davlat daromadi hisobiga ushlab qolgan holda 3 yil muddatga axloq tuzatish ishlari jazosi tayinlandi. Uning 3 oy 27 kun qamoqda o‘tirgani hisobga olinib, axloq tuzatish ishlarining 2 yil 9 kuni qoldirildi.
Izoh (0)