2018-yilning 10-dekabr kuni Andijon viloyatining Xonobod shahridagi “Andijonkabel” AJ O‘zbekiston-Rossiya qo‘shma korxonasi rahbariyati mazkur korxonaning 2-sexidan kabel simlar o‘g‘irlab ketilganligi to‘g‘risida shahar IIBga murojaat qilgan. Bu haqda Xonobod shahar IIB huzuridagi Tergov guruhi “Daryo”ga xabar bermoqda.
O‘g‘rilik 24-noyabrdan 25-noyabr kuniga o‘tar kechasi sodir bo‘lgan. Tezkor qidiruv jarayonida jami narxi 12 616 050 so‘mlik kabel simlarni ushbu korxona ishchilari — K.K, M.X, X.N, B.Yu, B.X, D.B. va H.T.lar yashirin ravishda talon-toroj qilganligi aniqlandi.
Ushbu holat bo‘yicha yetti nafar shaxsga 2018-yil 12-dekabr kuni Jinoyat Kodeksining 169-modda 2-qismi “v” (bir guruh shaxslar tomonidan oldindan til biriktirib sodir etilgan o‘g‘rilik) bandi bilan jinoyat ishi qo‘zg‘atilgan. Hozirda ushbu jinoyat ishi jinoyat ishlari bo‘yicha Qo‘rg‘ontepa tuman sudi muhokamasiga yuborilgan.
Izoh (0)