14 январь Ватан ҳимоячилари куни муносабати билан Самарқанд вилояти ҳокимлиги ва вилоят ИИБ раҳбарияти хизмат вақтида ҳалок бўлган, йўл-патруль хизмати инспектори бўлиб ишлаган марҳум Иброҳим Нишонов оиласидан хабар олди. Бу ҳақда «Дарё» мухбири Фарҳод Норбўтаев хабар бермоқда.
Марҳум Иброҳим Нишонов Ўзбекистон Президентининг 2019 йил 11 январь кунидаги фармонига биноан «Жасорат» медали билан тақдирланди.
Ўз касбининг фидойиси Иброҳим Нишонов 2018 йилнинг май ойида ўз хизмат вазифасини ўтаётган вақтда ҳалокатга учраган. Вилоят ҳокимлиги ва бир гуруҳ ИИБ ходимлари марҳумнинг хонадонига ташриф буюриб, оила аъзолари, фарзандлари ҳолидан хабар олиб, уларга бошқарманинг рўзғор учун керакли бўлган озиқ-овқат маҳсулотлари, турли совғалар билан биргаликда фидокорона хизматлари учун «Жасорат» медалини топширди.Ширин Норматова, Самарқанд вилояти ИИБ матбуот хизмати раҳбари
2018 йил 24 май куни соат 12:05 да Самарқанд вилоятининг Паяриқ туманида йўл-патруль хизмати инспектори Иброҳим Нишонов Damas машинасини ҳайдовчи телефонда гаплашиб келаётганлиги сабабли тўхтатган. Ҳайдовчи С.Ш. тўхташ ишорасига бўйсунмай, ҳаракатни давом эттирган. Ўшанда ИИВ Damas ҳайдовчиси Нишоновни қасддан уриб юбориб, воқеа жойидан қочиб кетганини хабар қилганди. Иброҳим Нишонов олган жароҳатлари оқибатида касалхонада вафот этган.
Damas ҳайдовчиси С.Ш. Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлиши), 117-модданинг 2-қисми (одам ўлимига сабаб бўлган хавф остида қолдириш) билан айбдор деб топилди. С.Ш.га уч йил муддатга транспорт воситаларини бошқариш ҳуқуқидан маҳрум қилиниб, ҳар ойлик иш ҳақининг 20 фоизини давлат даромади ҳисобига ушлаб қолган ҳолда 3 йил муддатга ахлоқ тузатиш ишлари жазоси тайинланди. Унинг 3 ой 27 кун қамоқда ўтиргани ҳисобга олиниб, ахлоқ тузатиш ишларининг 2 йил 9 куни қолдирилди.
Изоҳ (0)