1974-yilda Namangan tumanining “Tepa-Qiyot” mahallasida tug‘ilgan Kamoliddin Toshpo‘latov Vatanning mard va jasur o‘g‘lonlaridan biri edi. Bu haqda “Daryo”ga Namangan viloyat hokimligi axborot xizmati ma’lum qildi.
Bolaligidan harbiy bo‘lishni niyat qilib, ushbu kasbni o‘zining hayot tarziga aylantirgan Kamoliddin 2000-yilda Surxondaryo viloyatining Sariosiyo tumanida terrorchi guruhlar bilan bo‘lgan jangda halok bo‘ldi. Bugun uning nomi chuqur hurmat bilan tilga olinadi. Ikki o‘g‘li esa ota izidan borib, harbiy bo‘lishni niyat qilgan.
O‘zbekiston Respublikasi Qurolli Kuchlari tashkil etilganligining 27 yilligi hamda Vatan himoyachilari kuni munosabati bilan Prezident farmoniga muvofiq Kamoliddin Toshpo‘latov “Jasorat” medali bilan taqdirlandi. Mukofotni topshirish uchun uning xonadoniga viloyat hokimi Xayrullo Bozarov, huquqni muofaza qiluvchi idoralar rahbarlari keldi.
Viloyat rahbari Kamoliddin Toshpo‘latovning oila a’zolaridan hol-ahvol so‘rab, bayram bilan muborakbod etdi. Marhum harbiyning turmush o‘rtog‘iga “Jasorat” medali va sovg‘a-salomlarni topshirdi.
Keyingi manzil Kamoliddin Toshpo‘latov va baynalminalchi jangchi Shermuhammad Siddiqov ta’lim olgan 24-sonli umumta’lim maktabi bo‘ldi. Maktabda ularga atab o‘rnatilgan yodgorlikka gullar qo‘yilib, xotiralariga ehtirom ko‘rsatildi.
Izoh (0)