O‘zbekiston Superligasida vaqti kelib jamoalar soni 16 taga qadar oshishi mumkin. Ammo 2019-yilda ham chempionatda 12 ta klub g‘oliblik uchun kurash olib boradi. Shu bilan birga musobaqa formatiga o‘zgartirish kiritildi, deb xabar beradi PFL matbuot xizmati.
Ta’kidlanishicha, Professional futbol ligasi 2019-yilda 12 ta klub uchun ishlab chiqilgan ikkinchi formatni sinab ko‘rishga qaror qilgan. Unga ko‘ra, jamoalar uy-safar tizimida jami 22 ta tur uchrashuvlarini o‘tkazadi. Qolgan 11 ta tur esa 22-turdan keyingi turnir jadvaliga qarab tuzib chiqiladi.
Bunda 1-o‘rinni qo‘lga kiritgan klub uchinchi davrada 2-o‘rin sohibini o‘z uyida qabul qiladi hamda 3-o‘rin maydoniga safar qiladi. 4-o‘rin egasini o‘z uyida qabul qiladi va 5-o‘rinni egallagan klub maydoniga boradi. Shu tariqa istalgan jamoa 22-tur yakuniga ko‘ra o‘zidan keyingi o‘rinda turgan klubni o‘z maydonida qabul qiladi va keyingisining maydonida mehmon bo‘ladi.
Qayd etilishicha, yangi formatda jamoalar mavsum so‘ngiga qadar ikkiga ajratilmaydi. Klublar ishlagan ochkolar o‘z o‘rnida qoladi. Uchinchi davra taqvimi 22-tur yakuniga yetganidan so‘ng 10 daqiqa ichida muxlislarga havola etiladi. Turlar ketma-ketligi yil avvalida tashlangan qur’a qanday ko‘rinish olgan bo‘lsa, 33-turga qadar shu ketma-ketlikda qoladi.
PFL hamda O‘FA chempionatning avvalgi formati o‘zini oqlamagani uchun emas, ikki yo‘lni solishtirish uchun ham shunday qarorga kelgan. Agar 2020-yilda ham jamoalar soni 12 ta bo‘lib qolaversa, u holda so‘nggi ikki yildagi formatdan qay biri yaxshiroqligi borasida katta so‘rovnoma o‘tkaziladi. U vaqtda deyarli barchada formatlarni solishtirib olish imkoniyati bo‘ladi, deyiladi xabarda.
Ma’lumot uchun, 2018-yilgi mavsumda Superliga bellashuvlari “oltin ochko” qoidasiga ko‘ra o‘tkazilgan va klublar jami 32 ta uchrashuvda maydonga tushgandi. Mazkur formatning eng asosiy o‘ziga xosliklari sifatida markaziy o‘yinlar sonining ikki barobar ko‘p bo‘lishi hamda chempionlik uchun kurash masalasiga autsayderlarning aralashmasligini ko‘rsatilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)