Ўзбекистон Суперлигаси формати яна ўзгартирилди

Ўзбекистон Суперлигасида вақти келиб жамоалар сони 16 тага қадар ошиши мумкин. Аммо 2019 йилда ҳам чемпионатда 12 та клуб ғолиблик учун кураш олиб боради. Шу билан бирга мусобақа форматига ўзгартириш киритилди, деб хабар беради ПФЛ матбуот хизмати.

Таъкидланишича, Профессионал футбол лигаси 2019 йилда 12 та клуб учун ишлаб чиқилган иккинчи форматни синаб кўришга қарор қилган. Унга кўра, жамоалар уй-сафар тизимида жами 22 та тур учрашувларини ўтказади. Қолган 11 та тур эса 22-турдан кейинги турнир жадвалига қараб тузиб чиқилади.

Бунда 1-ўринни қўлга киритган клуб учинчи даврада 2-ўрин соҳибини ўз уйида қабул қилади ҳамда 3-ўрин майдонига сафар қилади. 4-ўрин эгасини ўз уйида қабул қилади ва 5-ўринни эгаллаган клуб майдонига боради. Шу тариқа исталган жамоа 22-тур якунига кўра ўзидан кейинги ўринда турган клубни ўз майдонида қабул қилади ва кейингисининг майдонида меҳмон бўлади.

Қайд этилишича, янги форматда жамоалар мавсум сўнгига қадар иккига ажратилмайди. Клублар ишлаган очколар ўз ўрнида қолади. Учинчи давра тақвими 22-тур якунига етганидан сўнг 10 дақиқа ичида мухлисларга ҳавола этилади. Турлар кетма-кетлиги йил аввалида ташланган қуръа қандай кўриниш олган бўлса, 33-турга қадар шу кетма-кетликда қолади.

ПФЛ ҳамда ЎФА чемпионатнинг аввалги формати ўзини оқламагани учун эмас, икки йўлни солиштириш учун ҳам шундай қарорга келган. Агар 2020 йилда ҳам жамоалар сони 12 та бўлиб қолаверса, у ҳолда сўнгги икки йилдаги форматдан қай бири яхшироқлиги борасида катта сўровнома ўтказилади. У вақтда деярли барчада форматларни солиштириб олиш имконияти бўлади, дейилади хабарда.

Маълумот учун, 2018 йилги мавсумда Суперлига беллашувлари «олтин очко» қоидасига кўра ўтказилган ва клублар жами 32 та учрашувда майдонга тушганди. Мазкур форматнинг энг асосий ўзига хосликлари сифатида марказий ўйинлар сонининг икки баробар кўп бўлиши ҳамда чемпионлик учун кураш масаласига аутсайдерларнинг аралашмаслигини кўрсатилганди.