Farg‘onada viloyat sog‘liqni saqlash boshqarmasi, shahar-tuman tibbiyot birlashmalariga zamonaviy xizmat avtomashinalari topshirildi. Bu haqda O‘zA xabar bermoqda.
Viloyatda ayni paytda 26 ta shahar va 89 ta qishloq oilaviy poliklinikasi aholiga samarali xizmat ko‘rsatmoqda. O‘tgan bir yil davomida birlamchi tibbiy-sanitariya yordami muassasalari moddiy-texnik bazasini yanada mustahkamlash maqsadida bir qator ishlar amalga oshirildi.
Xususan, shahar va tumanlar shoshilinch tibbiy yordamga mo‘ljallangan xorijda ishlab chiqarilgan 23 ta tez yordam mashinasi bilan ta’minlandi. Shahar va tuman tibbiyot birlashmalariga Cobalt avtomobillari topshirilishi ham sohaga qaratilayotgan doimiy e’tibor ifodasi bo‘ldi.
— Oila salomatligi, onalik va bolalikni muhofaza qilish, kasalliklar profilaktikasi, patronaj va uyma-uy yurish bo‘yicha tadbirlarni samarali amalga oshirish, sog‘lom turmush tarzini shakllantirish biz, tibbiyot birlashmalari rahbarlarining muhim vazifalaridan biri, — deydi Beshariq tumani tibbiyot birlashmasi boshlig‘i Botirjon Qodirov. — O‘tgan yillar davomida tumanimizda zamonaviy tibbiyot majmuasi barpo etilib, eng chekka hududda ham tibbiy xizmatning barcha turini ko‘rsatish uchun sharoit yaratildi. Zamonaviy xizmat avtomashinasi olis qishloqlarimizda aholiga sifatli xizmat ko‘rsatishda muhim o‘rin tutadi.
Izoh (0)