Shavkat Mirziyoyev 24-iyul kuni 68 yoshni qarshi olgandi. Prezident shu munosabat bilan tabriklagan barchaga minnatdorlik bildirdi.
“Tug‘ilgan kunim munosabati bilan chin yurakdan muborakbod etib, o‘zlarining samimiy qutlovlari va ezgu tilaklarini bildirgan xorijiy davlatlar, hukumatlar va parlamentlar rahbarlari, xalqaro tashkilotlar yetakchilariga, taniqli siyosat va jamoat arboblari, ishbilarmon doiralar vakillariga, yurtimizdagi mehnat jamoalari, mahallalar, nuroniylar, xotin-qizlar va yoshlar tashkilotlari faollariga, tadbirkorlarimizga, mamlakatimiz va chet ellardagi barcha vatandoshlarimizga chuqur minnatdorlik izhor etaman”, dedi prezident.
Davlat rahbari uning nomiga yo‘llangan tabrik va tilaklarni, avvalo, ko‘pmillatli O‘zbekiston xalqi va davlatiga yuksak hurmat va ehtirom, dunyo hamjamiyati bilan yaqin hamkorlikda amalga oshirayotgan islohotlarga, O‘zbekiston kelajagiga ishonch va e’tibor ifodasi sifatida qabul qilishini bildirdi.
“Barcha tashabbus va dasturlarimizni doimo qo‘llab-quvvatlab kelayotgan mard va oliyjanob xalqimizga yana bir bor chin dildan farzandlik mehrim va ehtiromimni bildirishdan baxtiyorman”, deyiladi davlat rahbarining minnatdorchiligida.
O‘zbekiston prezidenti 2025-yil 24-iyul kuni 68 yoshga to‘ldi. Shu munosabat bilan xorijiy davlatlar, hukumatlar, parlamentlar, nufuzli xalqaro tashkilotlar, yetakchi xorijiy kompaniyalar rahbarlari, taniqli jamoat, din va sport arboblaridan tabriklar keldi. Jumladan, Rossiya, Xitoy, Ozarbayjon Turkiya, Italiya, Janubiy Koreya, Markaziy Osiyo davlatlari rahbarlari tabrik yo‘lladi.
Prezident axborot xizmati qutlovlar kelishda davom etayotganini ma’lum qilgandi.
Izoh (0)