Фарғонада вилоят соғлиқни сақлаш бошқармаси, шаҳар-туман тиббиёт бирлашмаларига замонавий хизмат автомашиналари топширилди. Бу ҳақда ЎзА хабар бермоқда.
Вилоятда айни пайтда 26 та шаҳар ва 89 та қишлоқ оилавий поликлиникаси аҳолига самарали хизмат кўрсатмоқда. Ўтган бир йил давомида бирламчи тиббий-санитария ёрдами муассасалари моддий-техник базасини янада мустаҳкамлаш мақсадида бир қатор ишлар амалга оширилди.
Хусусан, шаҳар ва туманлар шошилинч тиббий ёрдамга мўлжалланган хорижда ишлаб чиқарилган 23 та тез ёрдам машинаси билан таъминланди. Шаҳар ва туман тиббиёт бирлашмаларига Cobalt автомобиллари топширилиши ҳам соҳага қаратилаётган доимий эътибор ифодаси бўлди.
— Оила саломатлиги, оналик ва болаликни муҳофаза қилиш, касалликлар профилактикаси, патронаж ва уйма-уй юриш бўйича тадбирларни самарали амалга ошириш, соғлом турмуш тарзини шакллантириш биз, тиббиёт бирлашмалари раҳбарларининг муҳим вазифаларидан бири, — дейди Бешариқ тумани тиббиёт бирлашмаси бошлиғи Ботиржон Қодиров. — Ўтган йиллар давомида туманимизда замонавий тиббиёт мажмуаси барпо этилиб, энг чекка ҳудудда ҳам тиббий хизматнинг барча турини кўрсатиш учун шароит яратилди. Замонавий хизмат автомашинаси олис қишлоқларимизда аҳолига сифатли хизмат кўрсатишда муҳим ўрин тутади.
Изоҳ (0)