Kecha, 24-iyul kuni Jennifer Lopes 56 yoshini nishonladi. Raqqosadan qo‘shiqchigacha, aktrisadan muvaffaqiyatli tadbirkor ayolgacha bo‘lgan yo‘lni bosib o‘tgan Jey Lo iste’dod, matonat va o‘ziga ishonch har qanday cho‘qqini zabt etishga yordam berishining timsoli hisoblanadi.
Bolalik va o‘smirlik davri
Jennifer Lopes Nyu Yorkda yashovchi oddiy puertorikalik oilada tug‘ilgan. Uning bolaligi megapolisning markaziy tumanlarida emas, balki shaharning eng xavfli hududlaridan biri hisoblangan notinch Bronksda o‘tgan. Bo‘lajak yulduzning qarindoshlari shou-biznes olamiga aloqador emasdi: otasi dasturlash bilan shug‘ullangan, onasi esa o‘zini uy yumushlariga va farzandlar tarbiyasiga bag‘ishlagan. Biroq bo‘lajak primadonna 5 yoshidayoq qo‘shiqchilik va raqs san’atini o‘rganishni boshlagan.
“Bolaligimdan hamma narsani bir vaqtning o‘zida qilishni xohlardim: qo‘shiq aytish, raqsga tushish va rollar ijro etish. Myuzikllar olamiga sho‘ng‘ishni yaxshi ko‘rardim”.
Jennifer Lopesning iste’dodi faqat musiqa va raqs bilan cheklanib qolmagan. Maktab yillarida u opa-singillari bilan katolik maktabida ta’lim olgan, akademik fanlardan tashqari sport bilan ham shug‘ullangan — yugurish, gimnastika va softbol musobaqalarida qatnashgan. Jismoniy faollik qizga kelishgan qomatga ega bo‘lish va chidamliligini oshirish imkonini bergan. Shunga qaramay, qiyinchiliklar paydo bo‘lganda Jennifer uchun diqqatini chalg‘itishning eng yaxshi usuli cherkov xorida qo‘shiq aytish va maktab teatrida ishtirok etish bo‘lgan.
Jennifer o‘rta ma’lumotni olgach, yuridik kollejga o‘qishga kiradi, ammo bu soha uning qiziqishlariga butunlay yot ekanligini tushunadi. Birinchi semestrni tugatgach, u o‘qishni tashlaydi. Ota-onasi bilan kelisholmay, uydan chiqib ketadi va Manxettenda ijaraga olingan kvartirada yashaydi. O‘zini ta’minlash uchun Lopes kunduzi advokatlik firmasida ishlar, kechalari esa raqqosa bo‘lib ishlardi.
Vaqt o‘tishi bilan uni teatr vakillari payqab qolishadi va Brodveydagi musiqali spektakllarda qatnashishga taklif qilishadi — tez orada Jennifer Yevropa bo‘ylab olti oylik gastrol safariga jo‘nagan Brodveyning “Golden Musicals” ansambliga taklif etiladi. Biroq xalqaro gastrollarga qaramay, Lopes natijalardan ko‘ngli to‘lmaydi, chunki u yakkaxon ijrochi emasdi.
Jey Lo kinoda
Jennifer Lopesning kinodagi dastlabki qadamlari uning ajoyib raqs mahoratini namoyish etish imkonini bergan kichik rollarda namoyon bo‘ldi. Haqiqiy professional yutuq “In Living Color” teleshousida ishtirok etishi bo‘ldi. U yerda Lopes ikki yil davomida aktyorlik mahoratini takomillashtirdi.
Kinodagi birinchi yirik rolini “Qayerdadir” filmida ijro etdi. Ushbu loyiha unga musiqiy tomoshalar bilan bog‘liq bo‘lgan avvalgi obrazlardan tubdan farq qiladigan dramatik qahramonni ijro etish imkonini berdi.
Kino karyerasidagi eng muhim boshlang‘ich nuqta “Mening oilam” filmida Mariya rolini ijro etishi bo‘ldi. Bu unga birinchi marta kino sohasidagi mutaxassislar e’tiborini jalb qilishga yordam berdi va eng yaxshi ikkinchi darajali ayol roli uchun Independent Spirit mukofotiga nomzod bo‘ldi.
Lopes bosh rolni ijro etgan “Selena” filmining chiqishi bilan e’tirofning yangi bosqichi boshlandi. U mashhur qo‘shiqchi Selena obrazini ekranda gavdalantirish imkoniyatini qo‘lga kiritish uchun kastinglardan o‘tishiga to‘g‘ri keldi. Film orqali aktrisa o‘zining aktyorlik qobiliyati haqidagi tanqidchilar shubhalarini ortda qoldirib, iste’dodini namoyon qildi. Ushbu roli uchun u birinchi marta “Oltin globus” mukofotiga nomzod bo‘ldi.
Haqiqiy yutuq 1998-yilda Lopes Jorj Kluni bilan birga “Ko‘rish maydonidan tashqarida” filmida rol o‘ynaganida yuz berdi. U 1 million dollarlik gonorar olib, bunday moliyaviy natijaga erishgan birinchi Lotin Amerikasi aktrisasiga aylandi.
Musiqa sohasidagi shuhratining o‘sishi tufayli Lopes tez-tez romantik komediyalarda bosh rollarga taklif etildi, bu yerda uning mashhurligi tomoshabinlar qiziqishini kafolatlardi.
2016-yilda u birinchi marta ko‘p qismli loyihada o‘zini sinab ko‘rdi va “Ko‘k tuslar” serialida bosh rolni ijro etdi. U yerda Federal tergov byurosi tomonidan korrupsiya bo‘yicha tergovga jalb qilingan politsiyachi obrazini yaratdi.
2019-yilda Lopes “Qaytadan boshla” komediyasida romantik obrazga qaytdi, shuningdek, “Raqqosalar” dramasida asosiy rolni ijro etdi. 2022-yilda aktrisa o‘z shaxsiyatiga moslashtirilgan “Orzumdagi erkak” filmida rol o‘ynadi. 2024-yil may oyida Netflix tomoshabinlarga “Atlas” ilmiy-fantastik jangovar filmini taqdim etdi, unda bosh rol yana Jey Loga nasib etdi.
Jenifer Lopesning karyera yo‘li turli janrlarni qamrab olgan 40 dan ortiq rollarni o‘z ichiga oladi: yengil romantik komediyalardan tortib og‘ir ruhiy drama va keskin trillerlargacha.
Musiqa karyerasi
Jey Lo qo‘shiqchi sifatida 1999-yilda debyut qilgan bo‘lsa-da, uning musiqa sohasidagi tez rivojlanishi yosh hal qiluvchi ahamiyatga ega emasligini ko‘rsatdi. U san’at maktabiga qatnagan Nyu York metro liniyasi raqami sharafiga nomlangan “On the 6” albomi Amerika Billboardida o‘ninchi o‘rinni egalladi. “If You Had My Love” singli bir necha hafta davomida jahon reytinglarida peshqadamlik qildi.
Ikki yildan so‘ng chiqarilgan “J. Lo” nomli ikkinchi albom Lopesga yanada kattaroq muvaffaqiyat keltirdi. U nufuzli “Gremmi” mukofotiga bir necha bor nomzod bo‘ldi, ijodi boshqa san’atkorlar bilan hamkorlikda boyidi. Faoliyati davomida u 8 ta albom yaratdi.
2014-yilda Lopes Braziliyada o‘tkazilgan futbol bo‘yicha jahon chempionatida Pitbul va braziliyalik qo‘shiqchi Klaudiya Leytte bilan birgalikda turnirning rasmiy qo‘shig‘i “We Are One”ni ijro etib, millionlab muxlislarni hayratga soldi.
2018-yil kuzida xonanda ispancha “El Anillo” qo‘shig‘i bilan muxlislarni xursand qildi. Klip birinchi kunda 3 milliondan ortiq ko‘rildi, bir yil ichida esa umumiy ko‘rishlar soni chorak milliardga yaqinlashdi.
2020-yil Lopes Super Bowl Halftime Show futbol musobaqasidagi chiqishi bilan e’tiborni tortdi. U yerda Shakira bilan hamkorlikda “Jenny from the Block”, “Get Right” va “Waiting for Tonight” kabi hit qo‘shiqlarini ijro etdi.
2025-yilda Jennifer Lopes “Up All Night: Live in 2025” nomli xalqaro konsert turini boshladi. Bu tur Yevropa mamlakatlari, Osiyo mintaqasi va Afrika qit’asidagi chiqishlarni o‘z ichiga olgan edi.
Shu yilning 7-avgust kuni jahon yulduzi Toshkentdagi “Bunyodkor” stadionida ham xalqaro konserti doirasida chiqish qiladi.
Shaxsiy hayoti
Jennifer Lopesning shaxsiy hayoti doimo gazeta sarlavhalarida o‘rin egallab kelgan. Yulduz to‘rt marta turmush qurgan va ikki farzandni tarbiyalamoqda.
Birinchi turmush o‘rtog‘i kubalik Ohani Noa Lopes bilan 1997-yilda tanishgan, ammo ular bir yildan so‘ng ajrashgan. Keyinchalik Noa shaxsiy xatlar va ularning munosabatlariga oid maxfiy ma’lumotlarni o‘z ichiga olgan kundalikni oshkor qilishga uringan, biroq sud bu materiallarni tarqatishni ma’n etib, uni Lopesga katta miqdorda tovon puli to‘lashga majbur qilgan.
.jpg)
Keyingi tanlov raqqos Kris Jadd bo‘lib, Lopes u bilan 2001-yilda turmush qurgan. Ularning munosabatlari “Love Don’t Cost a Thing” klipi ustida birgalikda ishlash jarayonida boshlangan. Biroq 2002-yilda er-xotin ajralishlarini e’lon qilishgan, bunga Krisning ommaviy axborot vositalarining haddan tashqari e’tiboridan noroziligi sabab bo‘lgan. Lopes Jaddga katta miqdorda tovon puli to‘lagan.
Lopes uchinchi marta 2004-yilda qo‘shiqchi Mark Entoni bilan turmush qurgan. Bu nikohdan Emma va Maks ismli egizaklar dunyoga kelgan. Biroq o‘n yildan so‘ng ularning munosabatlari yomonlashgan va Lopes nikohni bekor qilish tashabbusi bilan chiqqan, bu esa uning uchun og‘ir sinov bo‘lgan.
“Hech qachon ko‘zim tagi ko‘karmagan yoki labim shishmagan, lekin shunday munosabatlarim bo‘lganki, ularda qandaydir zo‘ravonlikni his qilganman: aqliy, hissiy yoki so‘z orqali”.
2017-yilda uning beysbolchi Aleks Rodriges bilan munosabatlari boshlandi. 2018-yilda ular unashtirilganliklarini e’lon qilishdi. Biroq 2021-yilda ular ajralishdi, ammo do‘stona munosabatlarni saqlab qolishdi.
Jennifer Lopes deyarli 20 yil o‘tgach, Ben Afflek bilan yana munosabatlarni tikladi. 2022-yil aprel oyida juftlik unashtirildi va iyul oyida Las-Vegasda nikoh marosimini o‘tkazdi.
2024-yilda ommaviy axborot vositalari ularning nikohidagi kelishmovchiliklar haqida xabar berdi, ayniqsa Beverli Hillzdagi oilaviy uylarini sotishga qo‘yilishi shov-shuvga sabab bo‘ldi. Iyun oyida OAV ularning ittifoqi buzilayotgani va Afflek Lopesning tug‘ilgan kuniga kelmaganini yozdi.
2024-yil avgust oyida yulduz ajrashish uchun ariza berdi, biroq o‘sha yilning kuzida ularni birga ko‘rishgan, bu esa yarashish ehtimoli haqidagi mish-mishlarni keltirib chiqardi. Rasman ularning ajrashishi 2025-yil yanvar oyida, tomonlar nikohdan oldin sotib olingan mulkni taqsimlash to‘g‘risida kelishuvga erishganlaridan so‘ng yakuniga yetdi.
Izoh (0)