O‘zbekiston milliy terma jamoasi o‘z tarixida ilk bor futbol bo‘yicha Jahon chempionatiga yo‘llanma oldi. 2026-yilgi mundial AQSH, Meksika va Kanada maydonlarida bo‘lib o‘tadi. Sport sharhlovchisi Davron Fayziyevning ma’lum qilishicha, Jahon chempionatining O‘zbekistondagi translyatsiya huquqini “Zo‘r TV” telekanali qo‘lga kiritgan. Uning so‘zlariga ko‘ra, muzokaralar muvaffaqiyatli yakunlangan va kanal 2026-yilgi mundialni to‘liq translyatsiya qiladi.
Bundan tashqari, “Zo‘r TV” Qatarda bo‘lib o‘tadigan 17 yoshgacha bo‘lgan futbolchilar o‘rtasidagi Jahon chempionatini ham namoyish etadi.
“Daryo” nashriga yaqin manbaning ma’lum qilishicha, “Zo‘r TV” telekanali tarkibida futbolga ixtisoslashgan yangi “Zo‘r Futbol” telekanali tashkil etilishi rejalashtirilgan. Dastlabki ma’lumotlarga ko‘ra, yangi kanal 2026-yil yanvar oyida efirga uzatilishi kutilmoqda.
Eslatib o‘tamiz, avvalroq “Setanta Sports” telekanali Angliya Premyer Ligasi uchrashuvlarining O‘zbekistondagi translyatsiya huquqini 2030-yilgacha sotib olgani haqida xabar berilgan edi.
Ma’lumot uchun, 2026-yilgi Jahon chempionati 11-iyundan 19-iyulgacha davom etadi. Musobaqa AQSH, Meksika va Kanadadagi 16 ta stadionda o‘tkaziladi.
Izoh (0)