Uber yo‘lovchi tashish xizmati ayol yo‘lovchilarga erkak haydovchilar bilan safarga chiqmaslik imkonini beruvchi yangi funksiyani taqdim etdi.
Xizmat 2025-yil avgustidan Qo‘shma Shtatlarda sinov tariqasida ishga tushiriladi. Foydalanuvchi har doimgidek mashina toifasini tanlaydi (ekonom yoki komfort), biroq buyurtma berishdan oldin haydovchi sifatida ayol kishini ma’qul ko‘rishini ham belgilab o‘tadi. Erkaklarga bunday xizmatdan foydalanish imkoni berilmaydi. Ayol haydovchilar ham faqat ayol yo‘lovchilarni qabul qilishni tanlash huquqiga ega.
Uber yangi xizmat yo‘lovchilar va haydovchilarning xavfsizligi hamda qulayligini ta’minlash maqsadida yaratilganini ta’kidladi. Kompaniya mazkur funksiyani dastlab Los Anjeles, San Fransisko va Detroyt shaharlarida sinovdan o‘tkazadi. Shuningdek, kompaniya ushbu xizmat ilgari Fransiya, Germaniya va Argentinada ham sinovdan o‘tkazilganini ma’lum qildi.
Avval ham Uber tomonidan gender bo‘yicha tanlov taklif etiladigan boshqa xizmatlar taklif etilgan. Masalan, 2019-yilda Uber Saudiya Arabistonida ayollar mashina haydash huquqini qo‘lga kiritganidan keyin, ayol haydovchilarni tanlash xizmatini joriy qilgan. Keyinchalik bu dastur taxminan 40 ta davlatda amal qila boshlagan. 2015-yilda kompaniya o‘tkazgan so‘rovnomada AQShdagi haydovchilarning qariyb 20 foizi ayollar ekanligi aniqlangan.
So‘nggi yillarda Uber xavfsizlikni oshirish maqsadida turli funksiyalarni joriy qilgan, xususan, o‘smirlar uchun alohida akkauntlar va yo‘lovchini PIN-kod orqali tasdiqlash imkoniyati ham yo‘lga qo‘yilmoqda.
Izoh (0)