Chirchiq oliy tank qo‘mondonlik-muhandislik bilim yurtida “Vatanparvarlik oyligi” doirasida kursantlar o‘rtasida “Biz, Temurbek vorislarimiz!” nomli ko‘rik-tanlov bo‘lib o‘tdi. Bu haqda Mudofaa vazirligi matbuot xizmati xabar berdi.
Unda bilim yurtining barcha bosqichlaridan jami sakkiz nafar kursant avtomatidan nishonga o‘q otish, avtomobil texnikalari me’yorlarini bajarish, milliy taomlar tayyorlash bo‘yicha oshpazlik mahorati namoyishi, “Temur tuzuklari” asari bo‘yicha intellektual bellashuv hamda mazkur asar asosida erkin mavzuda sahna ko‘rinishi shartlari bo‘yicha musobaqalashdi.
Kursantlarning barcha shartlarga puxta hozirlik ko‘rgani tanlovning murosasiz o‘tganida namoyon bo‘ldi. Harbiy texnikalarni saqlash parkidan o‘q otish mashg‘ulotlari maydoniga, o‘choqboshidan muhtasham sahnaga o‘tib, o‘zlarining har sohadan bir shingil mahoratlarini ko‘rsatgan bo‘lajak ofitserlar hakamlar hay’ati tomonidan baholab borildi.
Tanlovning yakuniy natijalariga ko‘ra, “Eng bilimdon kursant”, “Eng ilg‘or texnik”, “Eng iste’dodli kursant”, “Eng yaxshi mergan”, “Eng yaxshi oshpaz” nominatsiyalari bo‘yicha sovrindorlar va g‘oliblar aniqlandi.
Shuningdek, kun davomida harbiy xizmatchilar farzandlarining qishki ta’til vaqtlarini mazmunli o‘tkazish maqsadida tashkil etilgan shaxmat-shashka musobaqalari ham qiziqarli kechdi.
Bundan tashqari bilim yurtida buyuk sarkarda Amir Temurning “Temur tuzuklari” nomli kitobi asosida tuzilgan savollarga bilim yurti kursantlaridan tarkib topgan “Adolat qalqonlari” va Chirchiq davlat Pedagogika instituti talabalarining “Temuriy avlodlari” jamoalari zakovat o‘yinida bellashdilar.
Yakuniy natijada mezbon bilim yurti kursantlarining “Adolat qalqonlari” jamoasi yuqori ball bilan birinchilikni qo‘lga kiritdi.
Barcha g‘olib va sovrindorlar bilim yurti qo‘mondonligi tomonidan diplom, faxriy yorliq va esdalik sovg‘alari bilan taqdirlandi.
Izoh (0)