Hindistonlik millioner yetim qolgan 261 nafar kelinga sep olib berdi va ularning to‘yini o‘tkazdi

Hindistonning Surat shahrida yashovchi millioner otasiz qolgan qizlarning nikoh to‘yi uchun sep sotib olib berdi. Bu haqda Daily Mail xabar qildi.

Olmos magnati bo‘lgan Maxesh Savani tomonidan uyushtirilgan ommaviy nikoh to‘yida 261 nafar kelin ishtirok etgan. Ularning barchasi otasidan ajralgan, 54 nafar chin yetim bo‘lgan, 118 nafarida esa na aka-uka, na opa-singil bo‘lgan. Ular Savanining yordamisiz turmushga chiqa olmagan, chunki ularda sep sotib olishga pul bo‘lmagan.

Millionerning o‘zi, shuningdek, mansabdorlar va politsiyachilar nikoh to‘yida ota rolini o‘ynagan. Har bir juftlik sovg‘a sifatida uy jihozlari va 200 ming rupiylik sug‘urtani qo‘lga kiritgan.

Savani 2010-yildan buyon yetimlar uchun nikoh to‘yi uyushtiradi. U shu vaqtga qadar 3172 nafar qizga turmushga chiqishga yordam bergan. Millioner bu ishni o‘zining ijtimoiy javobgarligi deb bilgani uchun qilishini ta’kidlaydi.