Hech qayerda ishlamaydigan, g‘irt bekorchi odam “katta tashkilot”larda tanishlari borligi, ular orqali istalgan masalaga yechim topa olishi haqida og‘iz ko‘pirtirib gapirsa, biroz mushohadali kishi darhol uning firib ishlatayotganini fahmlaydi. Ammo ba’zi kimsalar, odatda biror muammo qarshisidan chiqishsa, uni qonuniy tartibda emas, qing‘ir yo‘llar bilan hal qilishga urinishadi. Bundaylar esa nayrang ishlatishda shaytonga ta’lim beradigan firibgarlarning o‘ljasiga aylanadi-qoladi, deyiladi UZ24 xabarida.
Dilshod Erkinov (ism-familiyalar o‘zgartirilgan) o‘rta ma’lumotli, ishsiz, buning ustiga muqaddam sudlangan. Ammo negadir uning huzuridan “madadtalab” kishilarning oyog‘i uzilmaydi. 2014-yilning sentabr oyi o‘rtalarida tanishi To‘xtamurod Davronov uni yo‘qlab qoldi. Sababi, To‘xtamurodga tanish bo‘lgan Mansur Ne’matovning jiyani Andijon viloyatidagi o‘rta-maxsus bilim yurtlarining birida bo‘lgan imtihonlardan o‘ta olmagan ekan. T.Davronov shu bolaga yordam qilib, uni qo‘shimcha o‘rin asosida o‘qishga kiritishda Dilshoddan ko‘mak so‘raydi.
Shu o‘rinda savol tug‘iladi, nima sababdan hech qayerda ishlamaydigan odamga bunday iltimos bilan murojaat qilish mumkin? Javobi shuki D.Erkinov o‘zini “katta tashkilot”lardagi tanishlari orqali har qanday ishning uddasidan chiqadigan kimsa qilib namoyon qilganki, To‘xtamurod qora tortib uning oldiga keladi.
Dilshod uning iltimosini eshitib, Milliy xavfsizlik xizmatida ishlaydigan tanishi orqali yordam berishini aytadi. 23-sentabr kuni To‘xtamurod jiyanini o‘qishga kiritish niyatida yurgan Mansurni ham boshlab keladi. Ular bilan uchrashgan Dilshod xizmat haqi sifatida M.Ne’matovdan 2 ming AQSh dollari oladi. Shu bilan jiyanini o‘qishga kirishiga ishongan Mansur qattiq yanglishgandi. Pul ham, qo‘shimcha o‘rin ham qulog‘ini ushlab ketadi. Dilshod “ko‘kat”larni osongina hazm qilib yuboradi.
2014-yilning oktabr oylarida Bosh prokuratura tomonidan “Oqoltin don mahsulotlari” AJning mansabdor shaxslariga nisbatan qo‘zg‘atilgan jinoyat ishi bo‘yicha Fazliddin Dadajonov ehtiyot chorasi sifatida qamoqqa olinadi. Taqdirning charxpalagini qarangki, ukasini qamoqdan chiqarish uchun yelib-yugurayotgan Jaloliddin Dadajonov ham aynan Dilshodga ro‘para bo‘ladi. Ularning o‘zaro suhbatlari natijasida D.Erkinov Bosh prokuraturada ishlovchi mansabdor shaxslar orqali ehtiyot chorasini o‘zgartirish yoki yengillik berish masalasini ijobiy hal qilishni zimmasiga oladi. Bu ishda u o‘ziga avvaldan tanish bo‘lgan, aldov to‘rini to‘qishda ustasi farang bo‘lib ketgan Arsen Xabirov (unga nisbatan alohida jinoyat ishi yuritilib, jazo muqarrarligi ta’minlangan) bilan «hamkorlik» qiladi.
Muqaddam huquqni muhofaza qiluvchi organda ishlagan A.Xabirov F.Dadajonovning ishi bilan shug‘ullanayotgan tergovchini tanishini, u orqali qamoq ehtiyot chorasini o‘zgartirishga yordam berishni va’da qilgan bo‘lsa-da, aslida firibgarlik yo‘li bilan mo‘may daromadli bo‘lib qolishni o‘ylayotgandi. Dilshod va Arsen turli «sahna ko‘rinishlari» bilan Jaloliddinning ishonchiga kirib, ukasini qamoqdan chiqarish uchun 400 ming AQSh dollari so‘rashadi. J.Dadajonov ayni damda buncha puli yo‘qligini aytib, bo‘nak sifatida 50 ming dollar berib, qolganini ish bitganidan keyin hisob-kitob qilishini aytadi. Ular “savdolashib”, mana shu qaror talabida to‘xtalishadi.
O‘sha yilning 24-oktabr kuni uchovlon Olmazor tumanida uchrashishadi. Jaloliddin aytilgan pulni firibgarlarning qo‘liga topshirib, ukasini ozodlikka chiqishiga umid bog‘laydi. Biroq uning umidlari sarob bo‘lib chiqadi. Qonunni chetlab o‘tib masalaga yechim topmoqchi bo‘lgan J.Dadajonov firibgarlarning to‘riga ilinib, aldanganidan keyin qonundan madad so‘rashga majbur bo‘ldi.
Jinoyat ishlari bo‘yicha Mirobod tuman sudi tomonidan sudlanuvchi Dilshod Erkinovning qilmishlari atroflicha muhokama qilinib, unga 6 yil-u 6 oy muddatga ozodlikdan mahrum qilish jazosi tayinlandi.
Izoh (0)