Ҳеч қаерда ишламайдиган, ғирт бекорчи одам «катта ташкилот»ларда танишлари борлиги, улар орқали исталган масалага ечим топа олиши ҳақида оғиз кўпиртириб гапирса, бироз мушоҳадали киши дарҳол унинг фириб ишлатаётганини фаҳмлайди. Аммо баъзи кимсалар, одатда бирор муаммо қаршисидан чиқишса, уни қонуний тартибда эмас, қинғир йўллар билан ҳал қилишга уринишади. Бундайлар эса найранг ишлатишда шайтонга таълим берадиган фирибгарларнинг ўлжасига айланади-қолади, дейилади UZ24 хабарида.
Дилшод Эркинов (исм-фамилиялар ўзгартирилган) ўрта маълумотли, ишсиз, бунинг устига муқаддам судланган. Аммо негадир унинг ҳузуридан «мададталаб» кишиларнинг оёғи узилмайди. 2014 йилнинг сентябрь ойи ўрталарида таниши Тўхтамурод Давронов уни йўқлаб қолди. Сабаби, Тўхтамуродга таниш бўлган Мансур Неъматовнинг жияни Андижон вилоятидаги ўрта-махсус билим юртларининг бирида бўлган имтиҳонлардан ўта олмаган экан. Т.Давронов шу болага ёрдам қилиб, уни қўшимча ўрин асосида ўқишга киритишда Дилшоддан кўмак сўрайди.
Шу ўринда савол туғилади, нима сабабдан ҳеч қаерда ишламайдиган одамга бундай илтимос билан мурожаат қилиш мумкин? Жавоби шуки Д.Эркинов ўзини «катта ташкилот»лардаги танишлари орқали ҳар қандай ишнинг уддасидан чиқадиган кимса қилиб намоён қилганки, Тўхтамурод қора тортиб унинг олдига келади.
Дилшод унинг илтимосини эшитиб, Миллий хавфсизлик хизматида ишлайдиган таниши орқали ёрдам беришини айтади. 23 сентябрь куни Тўхтамурод жиянини ўқишга киритиш ниятида юрган Мансурни ҳам бошлаб келади. Улар билан учрашган Дилшод хизмат ҳақи сифатида М.Неъматовдан 2 минг АҚШ доллари олади. Шу билан жиянини ўқишга киришига ишонган Мансур қаттиқ янглишганди. Пул ҳам, қўшимча ўрин ҳам қулоғини ушлаб кетади. Дилшод «кўкат»ларни осонгина ҳазм қилиб юборади.
2014 йилнинг октябрь ойларида Бош прокуратура томонидан «Оқолтин дон маҳсулотлари» АЖнинг мансабдор шахсларига нисбатан қўзғатилган жиноят иши бўйича Фазлиддин Дадажонов эҳтиёт чораси сифатида қамоққа олинади. Тақдирнинг чархпалагини қарангки, укасини қамоқдан чиқариш учун елиб-югураётган Жалолиддин Дадажонов ҳам айнан Дилшодга рўпара бўлади. Уларнинг ўзаро суҳбатлари натижасида Д.Эркинов Бош прокуратурада ишловчи мансабдор шахслар орқали эҳтиёт чорасини ўзгартириш ёки енгиллик бериш масаласини ижобий ҳал қилишни зиммасига олади. Бу ишда у ўзига аввалдан таниш бўлган, алдов тўрини тўқишда устаси фаранг бўлиб кетган Арсен Хабиров (унга нисбатан алоҳида жиноят иши юритилиб, жазо муқаррарлиги таъминланган) билан «ҳамкорлик» қилади.
Муқаддам ҳуқуқни муҳофаза қилувчи органда ишлаган А.Хабиров Ф.Дадажоновнинг иши билан шуғулланаётган терговчини танишини, у орқали қамоқ эҳтиёт чорасини ўзгартиришга ёрдам беришни ваъда қилган бўлса-да, аслида фирибгарлик йўли билан мўмай даромадли бўлиб қолишни ўйлаётганди. Дилшод ва Арсен турли «саҳна кўринишлари» билан Жалолиддиннинг ишончига кириб, укасини қамоқдан чиқариш учун 400 минг АҚШ доллари сўрашади. Ж.Дадажонов айни дамда бунча пули йўқлигини айтиб, бўнак сифатида 50 минг доллар бериб, қолганини иш битганидан кейин ҳисоб-китоб қилишини айтади. Улар «савдолашиб», мана шу қарор талабида тўхталишади.
Ўша йилнинг 24 октябрь куни учовлон Олмазор туманида учрашишади. Жалолиддин айтилган пулни фирибгарларнинг қўлига топшириб, укасини озодликка чиқишига умид боғлайди. Бироқ унинг умидлари сароб бўлиб чиқади. Қонунни четлаб ўтиб масалага ечим топмоқчи бўлган Ж.Дадажонов фирибгарларнинг тўрига илиниб, алданганидан кейин қонундан мадад сўрашга мажбур бўлди.
Жиноят ишлари бўйича Миробод туман суди томонидан судланувчи Дилшод Эркиновнинг қилмишлари атрофлича муҳокама қилиниб, унга 6 йил-у 6 ой муддатга озодликдан маҳрум қилиш жазоси тайинланди.
Изоҳ (0)