20-dekabr kuni O‘zbekiston musulmonlari idorasida har yili an’anaviy tarzda o‘tkazilib kelinayotgan “Eng ma’rifatli imom — 2018” ko‘rik tanlovining respublika bosqichi o‘tkazildi. Bu haqda O‘zbekiston musulmonlari idorasi matbuot xizmati xabar berdi.
Unda tanlovning Qoraqalpog‘iston Respublikasi, Toshkent shahri va viloyatlar bosqichida birinchi o‘rinni egallagan 14 nafar imom-xatib bellashdi.
Birinchi o‘rin g‘olibi deb Farg‘ona viloyati Marg‘ilon shahridagi “Xudoyorxoji” jome masjidi imom-noibi Abduvohid Ahmadaliyev topildi. Unga O‘zbekiston musulmonlari idorasining birinchi darajali diplomi va “Vaqf” xayriya jamoat fondi tomonidan taqdim etilgan noutbuk va 3 000 000 so‘m pul mukofoti topshirildi.
Ikkinchi o‘rin Toshkent shahar Yunusobod tumanidagi “Kulolqo‘rg‘on” jome masjidi imom-xatibi Yahyoxon Abdurahmonovga nasib qildi. Ikkinchi darajali diplomi va “Vaqf” xayriya jamoat fondi tomonidan taqdim etilgan LCD 42 televizor va 2 500 000 so‘m pul mukofoti topshirildi.
Uchinchi o‘ringa Toshkent viloyati Qibray tumanidagi “Sa’dullo ota” jome masjidi imom-xatibi Obidjon Mirhamidov loyiq deb topildi. Unga uchinchi darajali diplom, mikro to‘lqinli pech hamda 2 000 000 so‘m pul mukofoti topshirildi.
Bundan tashqari, tanlovda “Eng ko‘p obuna uyushtirgan imom”, “Eng ko‘p maqola chop etgan imom”, “Eng obod masjid”, “Eng innovatsion yondashuv” kabi bir qancha nominatsiyalarda ham g‘oliblar nomi e’lon qilindi.
Izoh (0)