20 декабрь куни Ўзбекистон мусулмонлари идорасида ҳар йили анъанавий тарзда ўтказилиб келинаётган «Энг маърифатли имом — 2018» кўрик танловининг республика босқичи ўтказилди. Бу ҳақда Ўзбекистон мусулмонлари идораси матбуот хизмати хабар берди.
Унда танловнинг Қорақалпоғистон Республикаси, Тошкент шаҳри ва вилоятлар босқичида биринчи ўринни эгаллаган 14 нафар имом-хатиб беллашди.
Биринчи ўрин ғолиби деб Фарғона вилояти Марғилон шаҳридаги «Худоёрхожи» жоме масжиди имом-ноиби Абдувоҳид Аҳмадалиев топилди. Унга Ўзбекистон мусулмонлари идорасининг биринчи даражали дипломи ва «Вақф» хайрия жамоат фонди томонидан тақдим этилган ноутбук ва 3 000 000 сўм пул мукофоти топширилди.
Иккинчи ўрин Тошкент шаҳар Юнусобод туманидаги «Кулолқўрғон» жоме масжиди имом-хатиби Яҳёхон Абдураҳмоновга насиб қилди. Иккинчи даражали дипломи ва «Вақф» хайрия жамоат фонди томонидан тақдим этилган LCD 42 телевизор ва 2 500 000 сўм пул мукофоти топширилди.
Учинчи ўринга Тошкент вилояти Қибрай туманидаги «Саъдулло ота» жоме масжиди имом-хатиби Обиджон Мирҳамидов лойиқ деб топилди. Унга учинчи даражали диплом, микро тўлқинли печ ҳамда 2 000 000 сўм пул мукофоти топширилди.
Бундан ташқари, танловда «Энг кўп обуна уюштирган имом», «Энг кўп мақола чоп этган имом», «Энг обод масжид», «Энг инновацион ёндашув» каби бир қанча номинацияларда ҳам ғолиблар номи эълон қилинди.
Изоҳ (0)