Deputatlar Toshkentda aholiga bepul xizmat ko‘rsatadigan shifoxonalar yo‘qligini tanqid qildi

Oliy Majlisi Qonunchilik palatasi majlisida deputatlar Sog‘liqni saqlash vaziri Alisher Shodmonovning hisobotini eshitdi. Bu haqda palata matbuot xizmati xabar berdi.

Parlament eshituvida deputatlar sog‘liqni saqlash vaziri e’tiborini sohadagi mavjud kamchiliklar, yechimini kutayotgan qator muammolar hamda fuqarolar tomonidan bildirilayotgan murojaatlarga qaratdi.

Deputatlarning fikriga ko‘ra, shifokorlar davriy tibbiy ko‘rikdan o‘tishi, malaka oshirishi yoki qayta ixtisoslashishi Sog‘liqni saqlash vazirligi tizimi tomonidan moliyalashtirilmagan, ularning toifa olishi uchun hamon to‘siqlar mavjudligi kadrlash yetishmovchiligida omil bo‘lib qolmoqda.

Bugungi kunda ixtisoslashgan tibbiyot markazlari soni 16 taga yetdi. Markazlar o‘z ishlarini tashkil etishda kasalliklarning hududlar bo‘yicha tahlillariga, shuningdek, chuqur ilmiy-nazariy tadqiqotlar natijalariga asoslanishi lozim. Respublika ixtisoslashtirilgan ilmiy-amaliy tibbiyot markazlari ko‘proq e’tiborni profilaktik tadbirlariga emas, balki davolashga qaratmoqda.

Parlament a’zolari vazirlik tomonidan ixtisoslashtirilgan markazlar faoliyatiga zamonaviy AKTlarni keng joriy etish orqali shaffoflik ta’minlash, bemorlarga navbatsiz davolanish imkonini yaratish borasida sustkashlikka yo‘l qo‘yilayotganini tanqid qildi. Qonunchilik palatasi sa’y-harakati bilan Toshkent shahridagi 47-sonli oilaviy poliklinikada namunaviy tarzda elektron poliklinika tizimi tashkil qilingani, u amaliyotda o‘z samarasini ko‘rsatgani qayd etildi.

Biroq soha mutaxassislari keng e’tirof etayotgan ushbu tajribani boshqa hududlarda ham joriy qilish ishlari vazirlik tomonidan o‘z holiga tashlab qo‘yilgan. Hanuzgacha hududlarda birlamchi muassasaga biriktirilgan aholining elektron ro‘yxati shakllantirilmagan.

Mamlakatdagi barcha tuman (shahar) tibbiyot birlashmalari tarkibida bepul xizmat ko‘rsatadigan shifoxonalar mavjud. Biroq Toshkent shahar tumanlarida bunday shifoxonalar yo‘qligi sababli poytaxt aholisi shahar shifoxonalarida pulli asosda davolanishga majbur bo‘lyapti. Navoiy viloyatining Navoiy va Zarafshon shaharlarida ham xuddi shunday holatni kuzatish mumkin.