O‘zbekiston aviakerosin va dizel yoqilg‘isi eksportini yo‘lga qo‘yishi mumkin. Bu haqda Toshkentda “Uzbekistan GTL” loyihasini moliyalashtirish hujjatlarini imzolash tadbirida “O‘zbekneftgaz” AJ boshqaruv raisi Bahrom Ashrafxonov ma’lum qildi, deya xabar beradi Sputnik.
Ashrafxonovning so‘zlariga ko‘ra, Qashqadaryo viloyatining G‘uzor tumanida qurilayotgan GTL zavodining asosiy maqsadi O‘zbekistonda qazib olinayotgan tabiiy gazni shu yerning o‘zida qayta chuqur ishlash hamda shu sintetik yoqilg‘ini ishlab chiqarish natijasida, chetdan, uchinchi davlatlardan kelayotgan uglevodorod xom-ashyosi importini keskin kamaytirishdan iborat.
“Zavodning qurilish ishlari 60 foizga bajarilgan va u 2020-yilning ikkinchi yarmida ishga tushirilishi rejalashtirilmoqda”, — dedi Ashrafxonov.
Ashrafxonov, shuningdek, GTL zavodi tufayli O‘zbekiston aviakerosin va dizel yoqilg‘isi importidan voz kechishi mumkinligini qayd etdi.
“Agar biz 311 ming tonna aviakerosinni O‘zbekistonning o‘zida ishlab chiqarsak, chet eldan import qilishga hojat qolmaydi. Biz bu orqali nafaqat ’O‘zbekiston havo yo‘llari’ning 118 ming tonna aviakerosinga bo‘lgan ehtiyojini qondirishimiz, balki ichki ehtiyojdan tashqari qolgan qismini eksportga yo‘naltirishimiz mumkin bo‘ladi. Bu loyiha O‘zbekistonga chetdan valyuta kirib kelishini ta’minlaydi degani”, — ta’kidladi “O‘zbekneftgaz” rahbari.
Izoh (0)