“O‘zbekiston GTL” loyiha kompaniyasi va “O‘zbekneftgaz” 15-dekabr, shanba kuni Toshkentda Uzbekistan GTL loyihasini amalga oshirish uchun 2,3 dollarlik moliyaviy hujjatlarni imzoladi. Bu haqda “Gazeta.uz” xabar bermoqda.
Tadbirda Xitoy davlat taraqqiyot banki, Koreya Eksimbanki, K-SURE Koreya savdo sug‘urta korporatsiyasi, “Gazprombank”, Rossiya eksport kreditlari va investitsiyalar sug‘urtasi bo‘yicha agentligi (EKSAR), Credit Suisse banki, Yaponiyaning MUFG, SMBC va Mizuho banklari vakillari, shuningdek, xalqaro konsultantlar, Xitoy, Rossiya, Janubiy Koreya elchixonalari vakillari, “O‘zbekneftgaz”, vazirlik va idoralar, O‘zbekiston tiklanish va taraqqiyot jamg‘armasi rahbariyati, bosh pudratchi vakillari va boshqalar ishtirok etdi.
“Gazeta.uz”ga ma’lum qilishlaricha, 1 milliard dollardan ziyodroq mablag‘ni Xitoy, 600 million dollardan ortiqrog‘ini Janubiy Koreya va 700 million dollarga yaqin mablag‘ni qolgan kreditorlar ajratmoqda.
“GTL loyihasi o‘z miqyosi bo‘yicha nafaqat O‘zbekiston, balki mintaqadagi eng yirik investitsion loyihalardan biri hisoblanadi. O‘zbekiston prezidentining qurilish maydonchasiga ikkinchi marta tashrif buyurib, uning amalga oshirilishi jarayoni bilan shaxsan tanishgani ham loyihaning strategik ahamiyatidan dalolat beradi”, — dedi “O‘zbekneftgaz” rahbari Bahrom Ashrafxonov.
“O‘zbekneftgaz” boshqaruvi raisining ma’lum qilishicha, EPC-shartnomasining umumiy protsessi 65 foizgachani tashkil etadi. Bosh pudratchi — Hyundai Engineering (Janubiy Koreya), Hyundai Engineering and Construction va Enter Engineering (Singapur).
Qashqadaryo viloyatidagi zavod maydonida qurilish ishlari davom etmoqda, bu yerda 500 nafardan ziyod ishchilar va mutaxassislar, jumladan, chet elliklar faoliyat olib bormoqda. Qurilisha 500 ga yaqin texnika jalb qilingan.
GTL (gas to liquids yoki gazdan suyuqlik olish) texnologiyasiga asoslangan bu kabi yuqori texnologiyali ishlab chiqarish dunyoda kam sonli, dedi “O‘zbekneftgaz” raisi. Zavod mahsulotlari O‘zbekistonga xorijdan neft xarid qilish uchun sarflanayotgan 1 milliard dollardan ziyod mablag‘ni tejash imkonini berishi kutilmoqda.
Loyihaning qiymati 3,6 milliard dollarni tashkil etadi. Qashqadaryo viloyatining G‘uzor tumanidagi zavod 2020-yilda ishga tushirilganidan so‘ng, 3,6 milliard kub metr gaz qayta ishlanib, 1,5 million tonna “Yevro-5” standartidagi sintetik suyuq yoqilg‘i, jumladan, 311 ming tonna aviakerosin, 742 ming tonna dizel yoqilg‘isi, 431 ming tonna neft va 53 ming tonna suyultirilgan gaz olish yo‘lga qo‘yiladi.
Izoh (0)