O‘zbekiston ichki ishlar vazirining birinchi o‘rinbosari Davron Nazarmuhammedov 14-dekabr kuni Oliy Majlis Senatining 17-yalpi majlisida mamlakatdagi kriminogen vaziyat to‘g‘risida hisobot berarkan, IIV tizimidagi huquqbuzarliklarga qarshi kurash masalasiga ham to‘xtalib o‘tdi, deya xabar bermoqda “Gazeta.uz”.
IIV rahbariyati vakiliga senator Abduqodir Toshqulov savol bilan murojaat qildi. IIV xizmat avtomobillari raqamlaridagi VSF harflarini jamoatchilik kengaytirib, “Vatanning sodiq farzandlari” deb ta’riflashini qayd etarkan, yaqinda Termizda ichki ishlar organi xodimi xizmat avtomobilida YPX xodimini urib ketgani bilan bog‘liq hodisani yodga oldi. Senator IIV bu kabi holatlarning oldini olish bo‘yicha nimalar qilayotganiga qiziqdi.
IIV rahbarining birinchi o‘rinbosari huquqni muhofaza qilish organlari xodimlari tomonidan sodir etilayotgan huquqbuzarliklar ichki ishlar organlari obro‘siga salbiy ta’sir ko‘rsatayotganini qayd etdi. “IIVning 120 ming kishilik shaxsiy tarkibi orasida poraxo‘rlikka qo‘l uruvchi nohalol xodimlar bor. Butun ichki ishlar organlarini sharmanda qiluvchi huquqbuzarliklar sodir etilgan holatlar ham bo‘ldi”, — deya tan oldi u.
2018-yilning 11 oyi davomida 6887 nafar xodim huquqbuzarlik sodir etib, ularning 1283 nafari ma’muriy, 165 nafari jinoiy javobgarlikka tortilgan. 1700 holatda profilaktika inspektorlari, 829 ta holatda yo‘l harakati xavfsizligi va 743 holatda turli darajadagi rahbar xodimlar huquqbuzarlik sodir etgan.
“Statistikaga qaraydigan bo‘lsa, bu kabi huquqbuzarliklar 60 foizga kamaygan. Ammo bunday statistika bo‘lmasligi kerak”, — deya xulosa qildi Davron Nazarmuhamedov.
Izoh (0)