Ўзбекистон авиакеросин ва дизель ёқилғиси экспортини йўлга қўйиши мумкин. Бу ҳақда Тошкентда «Uzbekistan GTL» лойиҳасини молиялаштириш ҳужжатларини имзолаш тадбирида «Ўзбекнефтгаз» АЖ бошқарув раиси Баҳром Ашрафхонов маълум қилди, дея хабар беради Sputnik.
Ашрафхоновнинг сўзларига кўра, Қашқадарё вилоятининг Ғузор туманида қурилаётган GTL заводининг асосий мақсади Ўзбекистонда қазиб олинаётган табиий газни шу ернинг ўзида қайта чуқур ишлаш ҳамда шу синтетик ёқилғини ишлаб чиқариш натижасида, четдан, учинчи давлатлардан келаётган углеводород хом-ашёси импортини кескин камайтиришдан иборат.
«Заводнинг қурилиш ишлари 60 фоизга бажарилган ва у 2020 йилнинг иккинчи ярмида ишга туширилиши режалаштирилмоқда», — деди Ашрафхонов.
Ашрафхонов, шунингдек, GTL заводи туфайли Ўзбекистон авиакеросин ва дизел ёқилғиси импортидан воз кечиши мумкинлигини қайд этди.
«Агар биз 311 минг тонна авиакеросинни Ўзбекистоннинг ўзида ишлаб чиқарсак, чет элдан импорт қилишга ҳожат қолмайди. Биз бу орқали нафақат ‘Ўзбекистон ҳаво йўллари’нинг 118 минг тонна авиакеросинга бўлган эҳтиёжини қондиришимиз, балки ички эҳтиёждан ташқари қолган қисмини экспортга йўналтиришимиз мумкин бўлади. Бу лойиҳа Ўзбекистонга четдан валюта кириб келишини таъминлайди дегани», — таъкидлади «Ўзбекнефтгаз» раҳбари.
Изоҳ (0)