«Ўзбекистон GTL» лойиҳа компанияси ва «Ўзбекнефтгаз» 15 декабрь, шанба куни Тошкентда Uzbekistan GTL лойиҳасини амалга ошириш учун 2,3 долларлик молиявий ҳужжатларни имзолади. Бу ҳақда «Газета.uz» хабар бермоқда.
Тадбирда Хитой давлат тараққиёт банки, Корея Эксимбанки, K-SURE Корея савдо суғурта корпорацияси, «Газпромбанк», Россия экспорт кредитлари ва инвестициялар суғуртаси бўйича агентлиги (ECSAR), Credit Suisse банки, Япониянинг MUFG, SMBC ва Mizuho банклари вакиллари, шунингдек, халқаро консултантлар, Хитой, Россия, Жанубий Корея элчихоналари вакиллари, «Ўзбекнефтгаз», вазирлик ва идоралар, Ўзбекистон тикланиш ва тараққиёт жамғармаси раҳбарияти, бош пудратчи вакиллари ва бошқалар иштирок этди.
«Газета.uz»га маълум қилишларича, 1 миллиард доллардан зиёдроқ маблағни Хитой, 600 миллион доллардан ортиқроғини Жанубий Корея ва 700 миллион долларга яқин маблағни қолган кредиторлар ажратмоқда.
«GTL лойиҳаси ўз миқёси бўйича нафақат Ўзбекистон, балки минтақадаги энг йирик инвестицион лойиҳалардан бири ҳисобланади. Ўзбекистон президентининг қурилиш майдончасига иккинчи марта ташриф буюриб, унинг амалга оширилиши жараёни билан шахсан танишгани ҳам лойиҳанинг стратегик аҳамиятидан далолат беради», — деди «Ўзбекнефтгаз» раҳбари Баҳром Ашрафхонов.
«Ўзбекнефтгаз» бошқаруви раисининг маълум қилишича, EPC-шартномасининг умумий процесси 65 фоизгачани ташкил этади. Бош пудратчи — Hyundai Engineering (Жанубий Корея), Hyundai Engineering and Construction ва Enter Engineering (Сингапур).
Қашқадарё вилоятидаги завод майдонида қурилиш ишлари давом этмоқда, бу ерда 500 нафардан зиёд ишчилар ва мутахассислар, жумладан, чет элликлар фаолият олиб бормоқда. Қурилиша 500 га яқин техника жалб қилинган.
GTL (gas to liquids ёки газдан суюқлик олиш) технологиясига асосланган бу каби юқори технологияли ишлаб чиқариш дунёда кам сонли, деди «Ўзбекнефтгаз» раиси. Завод маҳсулотлари Ўзбекистонга хориждан нефть харид қилиш учун сарфланаётган 1 миллиард доллардан зиёд маблағни тежаш имконини бериши кутилмоқда.
Лойиҳанинг қиймати 3,6 миллиард долларни ташкил этади. Қашқадарё вилоятининг Ғузор туманидаги завод 2020 йилда ишга туширилганидан сўнг, 3,6 миллиард куб метр газ қайта ишланиб, 1,5 миллион тонна «Евро-5» стандартидаги синтетик суюқ ёқилғи, жумладан, 311 минг тонна авиакеросин, 742 минг тонна дизель ёқилғиси, 431 минг тонна нефт ва 53 минг тонна суюлтирилган газ олиш йўлга қўйилади.
Изоҳ (0)