Ўзбекистон Олий Мажлис Сенатининг ўн еттинчи ялпи мажлисининг иккинчи иш кунида сенаторлар Фарғона вилояти ҳокимининг ҳудудларни ривожлантириш ҳамда халқ депутатлари маҳаллий Кенгашлари фаолияти ҳақидаги ҳисоботини тинглади, деб хабар берди «Дарё» мухбири Севара Нишонова.
Ҳоким ўз нутқида Фарғона вилоятида ҳудудларни ривожлантириш ҳамда халқ депутатлари маҳаллий Кенгашлари фаолияти самарадорлигини оширишга салбий таъсир кўрсатаётган кўплаб муаммо ва камчиликлар ҳақида тўхталиб ўтди.
«Айрим вазирлик ва марказий идораларнинг вилоятдаги мавжуд муаммолар ечимига комплекс ёндашмаётгани, уларни ҳал этиш бўйича маҳаллий ҳокимликларнинг ташаббуслари, таклифлари, аҳолининг хоҳиш-истаклари етарли даражада инобатга олинмаётгани оқибатида қатор масалалар долзарблигича қолмоқда», — дейди Фарғона вилояти ҳокими.
Фарғонада кўмир конларини излаб топиш ва улардан самарали фойдаланиш бўйича Ҳукумат даражасида белгиланган топшириқлар ижросига Давлат геология ва минерал ресурслар қўмитаси томонидан эътибор берилмагани оқибатида мазкур вазифани рўёбга чиқаришда вилоят ташкилотлари жиддий қийинчиликларга дуч келмоқда.
Ўзбекистон Республикаси Президентининг ташрифи давомида берилган топшириқлар ижросига ҳам айрим вазирлик ва идоралар томонидан жиддий эътибор қаратилмаган.
Хусусан, жорий йил 12—13 июнь кунларидаги ташриф давомида Сув хўжалиги вазирлиги, Молия вазирлиги, Инвестициялар бўйича давлат қўмитаси зиммасига Фарғона туманидаги Оқбилол массивидаги 3450 гектар экин ерларининг сув таъминотини яхшилаш мақсадида қурилиши тугалланмай қолган «Файзобод-2» насос станцияси қурилишини якунлаш масаласини бир ой муддатда ўрганиб чиқиш, тегишли хулосаларни Вазирлар Маҳакамасига киритиш вазифаси белгиланган.
Бироқ шу кунга қадар мазкур масала юзасидан Вазирлар Маҳкамасининг тегишли ҳужжати қабул қилинмаган.
«Ўзбекэнерго» акциядорлик жамияти томонидан вилоят истеъмолчилари, хусусан, ижтимоий объектлар, аҳоли ва тадбиркорлик субъектларини электр энергияси билан узлуксиз таъминлаш бўйича самарали чоралар ўз вақтида етарли даражада кўрилмаган.
Бевосита ўрганишлар шуни кўрсатдики, вилоят истеъмолчиларини электр энергияси билан таъминловчи электр тармоғининг 3,7 минг км қисми ёки 15 фоизи фойдаланиш учун қисман яроқсиз ҳолатга келган, 8,5 минг км дан ёки 35 фоиздан кўпроғи эскирган.
Вилоятдаги электр энергияси узатишга мўлжалланган симёғочларнинг аксарияти, трансформатор пунктларининг 2980 таси ёки 36 фоизи яроқсиз ҳолга келиб қолган ёхуд эскирган.
Оқибатда электр энергиясидаги мунтазам узилишлар аҳоли ва тадбиркорлик субъектларининг ҳақли эътирозларига сабаб бўлмоқда. Электр энергияси баъзи маҳаллаларга бир соат етказилса, икки соат тўхтатилмоқда.
«Ўзтрансгаз» акциядорлик жамияти томонидан зарур чоралар ўз вақтида кўрилмагани оқибатида вилоят аҳолисини ҳамда хўжалик юритувчи субъектларни газ билан таъминлаш борасидаги кўплаб муаммо ва камчиликлар сақланиб қолмоқда.
Вилоятдаги истеъмолчиларнинг 35 фоизи табиий газ билан таъминланмаган.
Бундан ташқари, ҳар бир хонадонга ойига 20 кг ўрнига бор-йўғи 9,4 кг суюлтирилган газ ажратилмоқда.
Вилоятга ажратилган суюлтирилган газни тўлиқ ташиб келиш учун қўшимча равишда 40 та вагон-цистернага эҳтиёж мавжуд.
Вилоят аҳолиси ва тадбиркорлик субъектларини ичимлик суви билан таъминлаш борасидаги айрим муаммолар ҳам долзарблигича қолмоқда.
Молия вазирлиги ҳамда бошқа масъул тузилмалар томонидан аҳоли ва ижтимоий муассасаларни ичимлик суви билан мавжуд эҳтиёжни инобатга олган ҳолда зарур ҳажмда таъминлаш бўйича кўрилаётган чоралар етарли эмас.
Бугунги кунда вилоятда мавжуд бўлган 6216 км ичимлик суви тармоқларидан 2732 км қисми ёки 43 фоизи таъмирталаб ҳолатга тушиб қолган.
Вилоятдаги 2604 дона сув иншоотларидан 548 таси ёки 21 фоизи уларга белгиланган муддатларда техник хизмат кўрсатилмаганлиги ва бошқа сабабларга кўра фойдаланиш учун яроқсиз ҳолга келган.
Бунинг оқибатида минглаб аҳоли марказлашган ичимлик суви билан таъминланмасдан қолмоқда.
Вилоятда яшовчи 3 миллион 600 минг нафар аҳолининг 756 минг нафари ёки 21 фоизи ичимлик сувини ташиб келиб ичишга мажбур бўлмоқда.
Вилоятда болаларни мактабгача таълимга қамраб олиш ҳолати қониқарли эмас.
Вилоят ҳудудидаги 3-7 ёшдаги 270,0 мингга яқин боладан 116,0 мингга яқини ёки 43,0 фоизи мактабгача таълимга қамраб олинган. 775 та давлат мактабгача таълим муассасасининг 167 таси ёки 22 фоизи марказлашган ичимлик суви тизимига уланмаган.
Бугунги кунда вилоятдаги умумтаълим мактабларининг 120 таси ёки 23 фоизи реконструкция ва капитал таъмирга муҳтож. Мазкур муассасаларнинг 323 таси ёки 61,2 фоизи марказлашган ичимлик суви билан, 497 таси ёки 94 фоизи марказлашган иссиқлик энергияси билан таъминланмаган.
Халқ таълими вазирлиги томонидан етарли эътибор ва ташаббус кўрсатилмаётгани оқибатида умумтаълим мактабларининг моддий-техник базаси билан боғлиқ камчиликлар узоқ йиллардан буён сақланиб қолмоқда.
Хусусан, мактабларда 1144 та парта етишмайди, 96 та физика, 146 та кимё, 146 та биология ўқув-лаборатория хоналари умуман жиҳозланмаган, ўқувчилар билимини баҳолаш натижалари қайд этиладиган синф журналлари шу кунга қадар таълим муассасаларига етказиб берилмаган.
Вилоятдаги умумтаълим мактабларида 46 нафар ўқитувчи етишмайди,2368 дан зиёд педагог эса ўрта-махсус маълумотга эга, холос.
Соғлиқни сақлаш вазирлиги томонидан соғлиқни сақлаш муассасаларининг самарали фаолият олиб бориши учун, хусусан, уларнинг моддий-техника базасини яхшилаш бўйича комплекс чора-тадбирлар етарли даражада кўрилмаган.
Вилоят соғлиқни сақлаш тизимидаги 315 та муассасанинг 212 таси мукаммал таъмирга муҳтож.
Вилоят кўп тармоқли тиббиёт марказининг аҳолига ихтисослаштирилган тиббий ёрдам кўрсатувчи бўлимларининг аксарияти мослаштирилган биноларда жойлашган.
Тиббиёт муассасаларининг 164 таси ёки 69 фоизи ичимлик суви ва газ билан узлуксиз таъминланмаган.
Вилоятдаги тиббиёт муассасаларида эса 243 нафар шифокор ва бошқа мутахассислар етишмайди.
Тизимдаги даволаш-профилактика муассасаларида ҳаёт учун энг муҳим ва керакли бўлган 23 турдаги 97 дона 912,5 миллиард сўмлик тиббий асбоб-ускуналарга эҳтиёж мавжуд.
Вилоят ҳокимлиги ва маҳаллий тадбиркорларнинг саъй-ҳаракати билан хусусий тиббий хизмат ривожлантирилмоқда. Бироқ,Соғлиқни сақлаш вазирлигининг кўрсатмаси асосида давлат тиббиёт муассасаларидаги ўринлар («койкалар») сони асоссиз равишда қисқартирилмоқда.
Изоҳ (0)