Samsung kompaniyasi O‘zbekistonda o‘zining birinchi to‘rt kamerali smartfoni savdosini boshladi. Bu haqda “Mobinfo.uz” xabar berdi.
Telefonning har bir kamerasi o‘z vazifasiga ega. Telefonning asosiy kamerasi 24 megapikselli sensor bo‘lib, kunduzi va tunda suratga olishga mo‘ljallangan. Ikkinchi kamera ikki karrali optik kattalashtirish imkoniga ega bo‘lib, 10 megapikselli tasvirni qamrab oladi.
120 darajali ultra keng burchakli kamera sakkiz megapikselli datchik bilan jihozlangan. To‘rtinchi kamera esa to‘qqiz megapikselli hisoblanadi.
Galaxy A9 6,3 dyuymli Super AMOLED displeyga, Android 8.0 Oreo operatsion tizimida ishlaydigan sakkiz yadroli protsessorga ega. Old kamera 24 megapikselli. Qurilma olti yoki sakkiz gigabaytli tezkor va 128 gigabaytli doimiy xotira bilan jihozlangan. Bundan tashqari, smartfonga hajmi 512 gigabaytgacha bo‘lgan microSD o‘rnatish mumkin.
Smartfon batareyasining sig‘imi 3800 milliamper/soatga teng. Gadjetning orqa tomonida barmoq izini oluvchi skaner o‘rnatilgan. Orqa tomonning o‘zi esa 3D-oyna bilan qoplangan.
Toshkentdagi “Fleshka” savdo markazida Samsung Galaxy A9 (2018)ning 128 Gb versiyasi 4,4 million so‘mdan sotilmoqda.
Ushbu qurilmani ko‘rsatilgan narxda sotib olishga “Daryo” nashri kafolat bermaydi. Qurilma va uning narxi haqidagi axborot faqat tanishish uchun taqdim etilgan.
Izoh (0)