Ўзбекистонда 4 та асосий камерали Samsung Galaxy A9 4,4 млн сўмдан сотувга чиқди

Samsung компанияси Ўзбекистонда ўзининг биринчи тўрт камерали смартфони савдосини бошлади. Бу ҳақда «Mobinfo.uz» хабар берди.

Телефоннинг ҳар бир камераси ўз вазифасига эга. Телефоннинг асосий камераси 24 мегапикселли сенсор бўлиб, кундузи ва тунда суратга олишга мўлжалланган. Иккинчи камера икки каррали оптик катталаштириш имконига эга бўлиб, 10 мегапикселли тасвирни қамраб олади.

120 даражали ультра кенг бурчакли камера саккиз мегапикселли датчик билан жиҳозланган. Тўртинчи камера эса тўққиз мегапикселли ҳисобланади.

Galaxy A9 6,3 дюймли Super AMOLED дисплейга, Android 8.0 Oreo операцион тизимида ишлайдиган саккиз ядроли процессорга эга. Олд камера 24 мегапикселли. Қурилма олти ёки саккиз гигабайтли тезкор ва 128 гигабайтли доимий хотира билан жиҳозланган. Бундан ташқари, смартфонга ҳажми 512 гигабайтгача бўлган microSD ўрнатиш мумкин.

Смартфон батареясининг сиғими 3800 миллиампер/соатга тенг. Гаджетнинг орқа томонида бармоқ изини олувчи сканер ўрнатилган. Орқа томоннинг ўзи эса 3D-ойна билан қопланган.

Тошкентдаги «Флешка» савдо марказида Samsung Galaxy A9 (2018)нинг 128 Гб версияси 4,4 миллион сўмдан сотилмоқда.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.